PSALMI 151

Μικρὸς ἤμην ἐν τοῖς ἀδελφοῖς μου

καὶ νεώτερος ἐν τῷ οἴκῳ τοῦ πατρός μου·

ἐποίμαινον τὰ πρόβατα τοῦ πατρός μου.

₂αἱ χεῖρές μου ἐποίησαν ὄργανον,

οἱ δάκτυλοί μου ἥρμοσαν ψαλτήριον.

₃καὶ τίς ἀναγγελεῖ τῷ κυρίῳ μου;

αὐτὸς κύριος, αὐτὸς εἰσακούει.

₄αὐτὸς ἐξαπέστειλεν τὸν ἄγγελον αὐτοῦ

καὶ ἦρέν με ἐκ τῶν προβάτων τοῦ πατρός μου

καὶ ἔχρισέν με ἐν τῷ ἐλαίῳ τῆς χρίσεως αὐτοῦ.

₅οἱ ἀδελφοί μου καλοὶ καὶ μεγάλοι,

καὶ οὐκ εὐδόκησεν ἐν αὐτοῖς κύριος.

₆ἐξῆλθον εἰς συνάντησιν τῷ ἀλλοφύλῳ,

καὶ ἐπικατηράσατό με ἐν τοῖς εἰδώλοις αὐτοῦ·

₇ἐγὼ δὲ σπασάμενος τὴν παρ᾽ αὐτοῦ μάχαιραν

ἀπεκεφάλισα αὐτὸν καὶ ἦρα ὄνειδος ἐξ υἱῶν Ισραηλ.