PSALMI 112

Αἰνεῖτε, παῖδες, κύριον,

αἰνεῖτε τὸ ὄνομα κυρίου·

₂εἴη τὸ ὄνομα κυρίου εὐλογημένον

ἀπὸ τοῦ νῦν καὶ ἕως τοῦ αἰῶνος·

₃ἀπὸ ἀνατολῶν ἡλίου μέχρι δυσμῶν

αἰνεῖτε τὸ ὄνομα κυρίου.

₄ὑψηλὸς ἐπὶ πάντα τὰ ἔθνη ὁ κύριος,

ἐπὶ τοὺς οὐρανοὺς ἡ δόξα αὐτοῦ.

₅τίς ὡς κύριος ὁ θεὸς ἡμῶν

ὁ ἐν ὑψηλοῖς κατοικῶν

₆καὶ τὰ ταπεινὰ ἐφορῶν

ἐν τῷ οὐρανῷ καὶ ἐν τῇ γῇ;

₇ὁ ἐγείρων ἀπὸ γῆς πτωχὸν

καὶ ἀπὸ κοπρίας ἀνυψῶν πένητα

₈τοῦ καθίσαι αὐτὸν μετὰ ἀρχόντων,

μετὰ ἀρχόντων λαοῦ αὐτοῦ·

₉ὁ κατοικίζων στεῖραν ἐν οἴκῳ

μητέρα τέκνων εὐφραινομένην.