IOB 26

₁Ὑπολαβὼν δὲ Ιωβ λέγει

₂Τίνι πρόσκεισαι ἢ τίνι μέλλεις βοηθεῖν;

πότερον οὐχ ᾧ πολλὴ ἰσχὺς καὶ ᾧ βραχίων κραταιός ἐστιν;

₃τίνι συμβεβούλευσαι; οὐχ ᾧ πᾶσα σοφία;

ἢ τίνι ἐπακολουθήσεις; οὐχ ᾧ μεγίστη δύναμις;

₄τίνι ἀνήγγειλας ῥήματα;

πνοὴ δὲ τίνος ἐστὶν ἡ ἐξελθοῦσα ἐκ σοῦ;

₅μὴ γίγαντες μαιωθήσονται*

ὑποκάτωθεν ὕδατος καὶ τῶν γειτόνων αὐτοῦ;

₆γυμνὸς ὁ ᾅδης ἐνώπιον αὐτοῦ,*

καὶ οὐκ ἔστιν περιβόλαιον τῇ ἀπωλείᾳ.

₇ἐκτείνων βορέαν ἐπ᾽ οὐδέν,*

κρεμάζων γῆν ἐπὶ οὐδενός·

₈δεσμεύων ὕδωρ ἐν νεφέλαις αὐτοῦ,*

καὶ οὐκ ἐρράγη νέφος ὑποκάτω αὐτοῦ·

₉ὁ κρατῶν πρόσωπον θρόνου,*

ἐκπετάζων ἐπ᾽ αὐτὸν νέφος αὐτοῦ.

₁₀πρόσταγμα ἐγύρωσεν ἐπὶ πρόσωπον ὕδατος*

μέχρι συντελείας φωτὸς μετὰ σκότους.

₁₁στῦλοι οὐρανοῦ ἐπετάσθησαν*

καὶ ἐξέστησαν ἀπὸ τῆς ἐπιτιμήσεως αὐτοῦ.‡

₁₂ἰσχύι κατέπαυσεν τὴν θάλασσαν,

ἐπιστήμῃ δὲ ἔτρωσε τὸ κῆτος·

₁₃κλεῖθρα δὲ οὐρανοῦ δεδοίκασιν αὐτόν,

προστάγματι δὲ ἐθανάτωσεν δράκοντα ἀποστάτην.

₁₄ἰδοὺ ταῦτα μέρη ὁδοῦ αὐτοῦ,*

καὶ ἐπὶ ἰκμάδα λόγου ἀκουσόμεθα ἐν αὐτῷ·‡

σθένος δὲ βροντῆς αὐτοῦ τίς οἶδεν ὁπότε ποιήσει;