PSALMI IUXTA LXX 98

Dominus regnavit irascantur populi

qui sedet super cherubin moveatur terra

₂Dominus in Sion magnus

et excelsus est super omnes populos

₃confiteantur nomini tuo magno quoniam terribile et sanctum est

₄et honor regis iudicium diligit

tu parasti directiones iudicium et iustitiam in Iacob tu fecisti

₅exaltate Dominum Deum nostrum

et adorate scabillum pedum eius quoniam sanctum est

₆Moses et Aaron in sacerdotibus eius

et Samuhel inter eos qui invocant nomen eius

invocabant Dominum et ipse exaudiebat illos

₇in columna nubis loquebatur ad eos

custodiebant testimonia eius et praeceptum quod dedit illis

₈Domine Deus noster tu exaudiebas illos

Deus tu propitius fuisti eis

et ulciscens in omnes adinventiones eorum

₉exaltate Dominum Deum nostrum et adorate in monte sancto eius

quoniam sanctus Dominus Deus noster