PSALMI IUXTA LXX 9

₂Confitebor tibi Domine in toto corde meo

narrabo omnia mirabilia tua

₃laetabor et exultabo in te psallam nomini tuo Altissime

₄in convertendo inimicum meum retrorsum

infirmabuntur et peribunt a facie tua

₅quoniam fecisti iudicium meum et causam meam

sedisti super thronum qui iudicas iustitiam

₆increpasti gentes ÷et: periit impius

nomen eorum delisti in aeternum et in saeculum ÷saeculi:

₇inimici defecerunt frameae in finem

et civitates destruxisti

periit memoria eorum cum sonitu

₈et Dominus in aeternum permanet

paravit in iudicio thronum suum

₉et ipse iudicabit orbem terrae in aequitate

iudicabit populos in iustitia

₁₀et factus est Dominus refugium pauperi

adiutor in oportunitatibus in tribulatione

₁₁et sperent in te qui noverunt nomen tuum

quoniam non dereliquisti quaerentes te Domine

₁₂psallite Domino qui habitat in Sion

adnuntiate inter gentes studia eius

₁₃quoniam requirens sanguinem eorum recordatus est

non est oblitus clamorem pauperum

₁₄miserere mei Domine vide humilitatem meam de inimicis meis

₁₅qui exaltas me de portis mortis

ut adnuntiem omnes laudationes tuas in portis filiae Sion

₁₆exultabo in salutari tuo

infixae sunt gentes in interitu quem fecerunt

in laqueo isto quem absconderunt conprehensus est pes eorum

₁₇cognoscitur Dominus iudicia faciens

in operibus manuum suarum conprehensus est peccator

canticum diapsalmatis

₁₈convertantur peccatores in infernum

omnes gentes quae obliviscuntur Deum

₁₉quoniam non in finem oblivio erit pauperis

patientia pauperum non peribit in finem

₂₀exsurge Domine non confortetur homo

iudicentur gentes in conspectu tuo

₂₁constitue Domine legislatorem super eos

sciant gentes quoniam homines sunt diapsalma

₂₂ut quid Domine recessisti longe

dispicis in oportunitatibus in tribulatione

₂₃dum superbit impius incenditur pauper

conprehenduntur in consiliis quibus cogitant

₂₄quoniam laudatur peccator in desideriis animae suae

et iniquus benedicitur

₂₅exacerbavit Dominum peccator

secundum multitudinem irae suae non quaeret

₂₆non est Deus in conspectu eius

inquinatae sunt viae illius in omni tempore

auferuntur iudicia tua a facie eius

omnium inimicorum suorum dominabitur

₂₇dixit enim in corde suo

non movebor a generatione in generationem sine malo

₂₈cuius maledictione os plenum est et amaritudine et dolo

sub lingua eius labor et dolor

₂₉sedet in insidiis cum divitibus in occultis ut interficiat innocentem

₃₀oculi eius in pauperem respiciunt

insidiatur in abscondito quasi leo in spelunca sua

insidiatur ut rapiat pauperem rapere pauperem dum adtrahit eum

₃₁in laqueo suo humiliabit eum

inclinabit se et cadet cum dominatus fuerit pauperum

₃₂dixit enim in corde suo oblitus est Deus

avertit faciem suam ne videat in finem

₃₃exsurge Domine Deus exaltetur manus tua

ne obliviscaris pauperum

₃₄propter quid inritavit impius Deum

dixit enim in corde suo non requiret

₃₅vides quoniam tu laborem et dolorem consideras

ut tradas eos in manus tuas

tibi derelictus est pauper orfano tu eras adiutor

₃₆contere brachium peccatoris et maligni

quaeretur peccatum illius et non invenietur

₃₇Dominus regnabit in aeternum et in saeculum ÷saeculi:

peribitis gentes de terra illius

₃₈desiderium pauperum exaudivit Dominus

praeparationem cordis eorum audivit auris tua

₃₉iudicare pupillo et humili

ut non adponat ultra magnificare se homo super terram