PSALMI IUXTA LXX 83

₂Quam dilecta tabernacula tua Domine virtutum

₃concupiscit et defecit anima mea in atria Domini

cor meum et caro mea exultavit in Deum vivum

₄etenim passer invenit ÷sibi: domum

et turtur nidum sibi ubi ponat pullos suos

altaria tua Domine virtutum rex meus et Deus meus

₅beati qui habitant in domo tua

in saecula saeculorum laudabunt te diapsalma

₆beatus vir cui est auxilium abs te

ascensiones in corde suo disposuit

₇in valle lacrimarum in loco quem posuit

₈etenim benedictiones dabit legis dator

ibunt de virtute in virtutem videbitur Deus deorum in Sion

₉Domine Deus virtutum exaudi orationem meam

auribus percipe Deus Iacob diapsalma

₁₀protector noster aspice Deus

et respice in faciem christi tui

₁₁quia melior est dies una in atriis tuis super milia

elegi abiectus esse in domo Dei mei

magis quam habitare in tabernaculis peccatorum

₁₂quia misericordiam et veritatem ÷diligit: Deus

gratiam et gloriam dabit Dominus

₁₃non privabit bonis eos qui ambulant in innocentia

Domine virtutum beatus vir qui sperat in te