PSALMI IUXTA LXX 59

₃Deus reppulisti nos et destruxisti nos

iratus es et misertus es nobis

₄commovisti terram et turbasti eam

sana contritiones eius quia commota est

₅ostendisti populo tuo dura potasti nos vino conpunctionis

₆dedisti metuentibus te significationem

ut fugiant a facie arcus diapsalma

ut liberentur dilecti tui

₇salvum fac dextera tua et exaudi me

₈Deus locutus est in sancto suo

laetabor et partibor Sicima

et convallem tabernaculorum metibor

₉meus est Galaad et meus ÷est: Manasses

et Effraim fortitudo capitis mei

Iuda rex meus

₁₀Moab olla spei meae

in Idumeam extendam calciamentum meum

mihi alienigenae subditi sunt

₁₁quis deducet me in civitatem munitam

quis deducet me usque in Idumeam

₁₂nonne tu Deus qui reppulisti nos

et non egredieris Deus in virtutibus nostris

₁₃da nobis auxilium de tribulatione et vana salus hominis

₁₄in Deo faciemus virtutem

et ipse ad nihilum deducet tribulantes nos