PSALMI IUXTA LXX 5

₂Verba mea auribus percipe Domine intellege clamorem meum

₃intende voci orationis meae rex meus et Deus meus

₄quoniam ad te orabo Domine mane exaudies vocem meam

₅mane adstabo tibi et videbo

quoniam non deus volens iniquitatem tu es

₆neque habitabit iuxta te malignus

neque permanebunt iniusti ante oculos tuos

₇odisti omnes qui operantur iniquitatem

perdes ÷omnes: qui loquuntur mendacium

virum sanguinum et dolosum abominabitur Dominus

₈ego autem in multitudine misericordiae tuae

introibo in domum tuam

adorabo ad templum sanctum tuum in timore tuo

₉Domine deduc me in iustitia tua propter inimicos meos

dirige in conspectu meo viam tuam

₁₀quoniam non est in ore eorum veritas

cor eorum vanum est

₁₁sepulchrum patens est guttur eorum

linguis suis dolose agebant iudica illos Deus

decidant a cogitationibus suis

secundum multitudinem impietatum eorum expelle eos

quoniam inritaverunt te Domine

₁₂et laetentur omnes qui sperant in te

in aeternum exultabunt et habitabis in eis

et gloriabuntur in te omnes qui diligunt nomen tuum

₁₃quoniam tu benedices iusto

Domine ut scuto bonae voluntatis coronasti nos