PSALMI IUXTA LXX 46

₂Omnes gentes plaudite manibus iubilate Deo in voce exultationis

₃quoniam Dominus excelsus terribilis

rex magnus super omnem terram

₄subiecit populos nobis et gentes sub pedibus nostris

₅elegit nobis hereditatem suam

speciem Iacob quam dilexit diapsalma

₆ascendit Deus in iubilo Dominus in voce tubae

₇psallite Deo nostro psallite psallite regi nostro psallite

₈quoniam rex omnis terrae Deus psallite sapienter

₉regnavit Deus super gentes

Deus sedit super sedem sanctam suam

₁₀principes populorum congregati sunt cum Deo Abraham

quoniam Dei fortes terrae vehementer elevati

sunt