PSALMI IUXTA LXX 43

₂Deus auribus nostris audivimus

patres nostri adnuntiaverunt nobis

opus quod operatus es in diebus eorum in diebus antiquis

₃manus tua gentes disperdit et plantasti eos

adflixisti populos et expulisti eos

₄nec enim in gladio suo possederunt terram

et brachium eorum non salvavit eos

sed dextera tua et brachium tuum

et inluminatio faciei tuae

quoniam conplacuisti in eis

₅tu es ipse rex meus et Deus meus qui mandas salutes Iacob

₆in te inimicos nostros ventilabimus cornu

et in nomine tuo spernemus insurgentes in nobis

₇non enim in arcu meo sperabo et gladius meus non salvabit me

₈salvasti enim nos de adfligentibus nos

et odientes nos confudisti

₉in Deo laudabimur tota die

et in nomine tuo confitebimur in saeculum diapsalma

₁₀nunc autem reppulisti et confudisti nos

et non egredieris in virtutibus nostris

₁₁avertisti nos retrorsum post inimicos nostros

et qui oderunt nos diripiebant sibi

₁₂dedisti nos tamquam oves escarum et in gentibus dispersisti nos

₁₃vendidisti populum tuum sine pretio

et non fuit multitudo in commutationibus nostris

₁₄posuisti nos obprobrium vicinis nostris

subsannationem et derisum his qui in circuitu nostro

₁₅posuisti nos in similitudinem gentibus

commotionem capitis in populis

₁₆tota die verecundia mea contra me est

et confusio faciei meae cooperuit me

₁₇a voce exprobrantis et obloquentis a facie inimici et persequentis

₁₈haec omnia venerunt super nos nec obliti sumus te

et inique non egimus in testamento tuo

₁₉et non recessit retrorsum cor nostrum

et declinasti semitas nostras a via tua

₂₀quoniam humiliasti nos in loco adflictionis

et cooperuit nos umbra mortis

₂₁si obliti sumus nomen Dei nostri

et ÷si: expandimus manus nostras ad deum alienum

₂₂nonne Deus requiret ista ipse enim novit abscondita cordis

quoniam propter te mortificamur omni die

aestimati sumus sicut oves occisionis

₂₃exsurge quare dormis Domine

exsurge ÷et: ne repellas in finem

₂₄quare faciem tuam avertis

oblivisceris inopiae nostrae et tribulationis nostrae

₂₅quoniam humiliata est in pulvere anima nostra

conglutinatus est in terra venter noster

₂₆exsurge adiuva nos

et redime nos propter nomen tuum