PSALMI IUXTA LXX 20

₂Domine in virtute tua laetabitur rex

et super salutare tuum exultabit vehementer

₃desiderium animae eius tribuisti ei

et voluntate labiorum eius non fraudasti eum diapsalma

₄quoniam praevenisti eum in benedictionibus dulcedinis

posuisti in capite eius coronam de lapide pretioso

₅vitam petiit a te et tribuisti ei

longitudinem dierum in saeculum et in saeculum saeculi

₆magna gloria eius in salutari tuo

gloriam et magnum decorem inpones super eum

₇quoniam dabis eum benedictionem in saeculum saeculi

laetificabis eum in gaudio cum vultu tuo

₈quoniam rex sperat in Domino

et in misericordia Altissimi non commovebitur

₉inveniatur manus tua omnibus inimicis tuis

dextera tua inveniat ÷omnes: qui te oderunt

₁₀pones eos ut clibanum ignis in tempore vultus tui

Dominus in ira sua conturbabit eos

et devorabit eos ignis

₁₁fructum eorum de terra perdes et semen eorum a filiis hominum

₁₂quoniam declinaverunt in te mala

cogitaverunt consilia quae non potuerunt ÷stabilire:

₁₃quoniam pones eos dorsum

in reliquis tuis praeparabis vultum eorum

₁₄exaltare Domine in virtute tua

cantabimus et psallemus virtutes tuas