PSALMI IUXTA LXX 19

₂Exaudiat te Dominus in die tribulationis

protegat te nomen Dei Iacob

₃mittat tibi auxilium de sancto et de Sion tueatur te

₄memor sit omnis sacrificii tui

et holocaustum tuum pingue fiat diapsalma

₅tribuat tibi secundum cor tuum

et omne consilium tuum confirmet

₆laetabimur in salutari tuo

et in nomine Dei nostri magnificabimur

₇impleat Dominus omnes petitiones tuas

nunc cognovi quoniam salvum fecit Dominus christum suum

exaudiet illum de caelo sancto suo

in potentatibus salus dexterae eius

₈hii in curribus et hii in equis

nos autem in nomine Domini Dei nostri invocabimus

₉ipsi obligati sunt et ceciderunt

nos vero surreximus et erecti sumus

₁₀Domine salvum fac regem

et exaudi nos in die qua invocaverimus te