PSALMI IUXTA LXX 14

Domine quis habitabit in tabernaculo tuo

aut quis requiescet in monte sancto tuo

₂qui ingreditur sine macula et operatur iustitiam

₃qui loquitur veritatem in corde suo

qui non egit dolum in lingua sua nec fecit proximo suo malum

et obprobrium non accepit adversus proximos suos

₄ad nihilum deductus est in conspectu eius malignus

timentes autem Dominum glorificat

qui iurat proximo suo et non decipit

₅qui pecuniam suam non dedit ad usuram

et munera super innocentes non accepit

qui facit haec non movebitur in aeternum