PSALMI IUXTA LXX 118

Beati inmaculati in via qui ambulant in lege Domini

₂beati qui scrutantur testimonia eius

in toto corde exquirent eum

₃non enim qui operantur iniquitatem in viis eius ambulaverunt

₄tu mandasti mandata tua custodire nimis

₅utinam dirigantur viae meae ad custodiendas iustificationes tuas

₆tunc non confundar

cum perspexero in omnibus mandatis tuis

₇confitebor tibi in directione cordis

in eo quod didici iudicia iustitiae tuae

₈iustificationes tuas custodiam non me derelinquas usquequaque

₉In quo corriget adulescentior viam

suam

in custodiendo sermones tuos

₁₀in toto corde meo exquisivi te non repellas me a mandatis tuis

₁₁in corde meo abscondi eloquia tua ut non peccem tibi

₁₂benedictus es Domine doce me iustificationes tuas

₁₃in labiis meis pronuntiavi omnia iudicia oris tui

₁₄in via testimoniorum tuorum delectatus sum

sicut in omnibus divitiis

₁₅in mandatis tuis exercebor et considerabo vias tuas

₁₆in iustificationibus tuis meditabor non obliviscar sermones tuos

₁₇Retribue servo tuo

vivifica me et custodiam sermones tuos

₁₈revela oculos meos et considerabo mirabilia de lege tua

₁₉incola ego sum in terra non abscondas a me mandata tua

₂₀concupivit anima mea desiderare iustificationes tuas in omni tempore

₂₁increpasti superbos maledicti qui declinant a mandatis tuis

₂₂aufer a me obprobrium et contemptum

quia testimonia tua exquisivi

₂₃etenim sederunt principes et adversum me loquebantur

servus autem tuus exercebatur in iustificationibus tuis

₂₄nam et testimonia tua meditatio mea

et consilium meum iustificationes tuae

₂₅Adhesit pavimento anima mea

vivifica me secundum verbum tuum

₂₆vias meas enuntiavi et exaudisti me doce me iustificationes tuas

₂₇viam iustificationum tuarum instrue me

et exercebor in mirabilibus tuis

₂₈dormitavit anima mea prae taedio confirma me in verbis tuis

₂₉viam iniquitatis amove a me

et lege tua miserere mei

₃₀viam veritatis elegi iudicia tua non sum oblitus

₃₁adhesi testimoniis tuis Domine noli me confundere

₃₂viam mandatorum tuorum cucurri cum dilatasti cor meum

₃₃Legem pone mihi Domine viam iustificationum tuarum

et exquiram eam semper

₃₄da mihi intellectum et scrutabor legem tuam

et custodiam illam in toto corde meo

₃₅deduc me in semita mandatorum tuorum quia ipsam volui

₃₆inclina cor meum in testimonia tua et non in avaritiam

₃₇averte oculos meos ne videant vanitatem in via tua vivifica me

₃₈statue servo tuo eloquium tuum in timore tuo

₃₉amputa obprobrium meum quod suspicatus sum

quia iudicia tua iucunda

₄₀ecce concupivi mandata tua in aequitate tua vivifica me

₄₁Et veniat super me misericordia tua Domine

salutare tuum secundum eloquium tuum

₄₂et respondebo exprobrantibus mihi verbum

quia speravi in sermonibus tuis

₄₃et ne auferas de ore meo verbum veritatis usquequaque

quia in iudiciis tuis supersperavi

₄₄et custodiam legem tuam semper in saeculum et in saeculum saeculi

₄₅et ambulabam in latitudine quia mandata tua exquisivi

₄₆et loquebar in testimoniis tuis in conspectu regum

et non confundebar

₄₇et meditabar in mandatis tuis quae dilexi

₄₈et levavi manus meas ad mandata quae dilexi

et exercebar in iustificationibus tuis

₄₉Memor esto verbi tui servo tuo in quo mihi spem dedisti

₅₀haec me consolata est in humilitate mea

quia eloquium tuum vivificavit me

₅₁superbi inique agebant usquequaque

a lege autem tua non declinavi

₅₂memor fui iudiciorum tuorum a saeculo Domine et consolatus sum

₅₃defectio tenuit me

prae peccatoribus derelinquentibus legem tuam

₅₄cantabiles mihi erant iustificationes tuae

in loco peregrinationis meae

₅₅memor fui in nocte nominis tui Domine

et custodivi legem tuam

₅₆haec facta est mihi quia iustificationes tuas exquisivi

₅₇Portio mea Dominus dixi custodire legem tuam

₅₈deprecatus sum faciem tuam in toto corde meo

miserere mei secundum eloquium tuum

₅₉cogitavi vias meas

et avertisti pedes meos in testimonia tua

₆₀paratus sum et non sum turbatus ut custodiam mandata tua

₆₁funes peccatorum circumplexi sunt me

et legem tuam non sum oblitus

₆₂media nocte surgebam ad confitendum tibi

super iudicia iustificationis tuae

₆₃particeps ego sum omnium timentium te

et custodientium mandata tua

₆₄misericordia Domini plena est terra

iustificationes tuas doce me

₆₅Bonitatem fecisti cum servo tuo Domine

secundum verbum tuum

₆₆bonitatem et disciplinam et scientiam doce me

quia mandatis tuis credidi

₆₇priusquam humiliarer ego deliqui

propterea eloquium tuum custodivi

₆₈bonus es tu et in bonitate tua doce me iustificationes tuas

₆₉multiplicata est super me iniquitas superborum

ego autem in toto corde scrutabor mandata tua

₇₀coagulatum est sicut lac cor eorum

ego vero legem tuam meditatus sum

₇₁bonum mihi quia humiliasti me ut discam iustificationes tuas

₇₂bonum mihi lex oris tui super milia auri et argenti

₇₃Manus tuae fecerunt me et plasmaverunt me

da mihi intellectum et discam mandata tua

₇₄qui timent te videbunt me et laetabuntur

quia in verba tua supersperavi

₇₅cognovi Domine quia aequitas iudicia tua

et veritate humiliasti me

₇₆fiat misericordia tua ut consoletur me

secundum eloquium tuum servo tuo

₇₇veniant mihi miserationes tuae et vivam

quia lex tua meditatio mea est

₇₈confundantur superbi quia iniuste iniquitatem fecerunt in me

ego autem exercebor in mandatis tuis

₇₉convertantur mihi timentes te et qui noverunt testimonia tua

₈₀fiat cor meum inmaculatum in iustificationibus tuis

ut non confundar

₈₁Defecit in salutare tuum anima mea

in verbum tuum supersperavi

₈₂defecerunt oculi mei in eloquium tuum

dicentes quando consolaberis me

₈₃quia factus sum sicut uter in pruina

iustificationes tuas non sum oblitus

₈₄quot sunt dies servo tuo

quando facies de persequentibus me iudicium

₈₅narraverunt mihi iniqui fabulationes sed non ut lex tua

₈₆omnia mandata tua veritas

inique persecuti sunt me adiuva me

₈₇paulo minus consummaverunt me in terra

ego autem non dereliqui mandata tua

₈₈secundum misericordiam tuam vivifica me

et custodiam testimonia oris tui

₈₉In aeternum Domine verbum tuum permanet in caelo

₉₀in generationem et generationem veritas tua

fundasti terram et permanet

₉₁ordinatione tua perseverat dies quoniam omnia serviunt tibi

₉₂nisi quod lex tua meditatio mea est

tunc forte perissem in humilitate mea

₉₃in aeternum non obliviscar iustificationes tuas

quia in ipsis vivificasti me

₉₄tuus sum ego salvum me fac

quoniam iustificationes tuas exquisivi

₉₅me expectaverunt peccatores ut perderent me

testimonia tua intellexi

₉₆omni consummationi vidi finem

latum mandatum tuum nimis

₉₇Quomodo dilexi legem tuam

tota die meditatio mea est

₉₈super inimicos meos prudentem me fecisti mandato tuo

quia in aeternum mihi est

₉₉super omnes docentes me intellexi

quia testimonia tua meditatio mea est

₁₀₀super senes intellexi quia mandata tua quaesivi

₁₀₁ab omni via mala prohibui pedes meos ut custodiam verba tua

₁₀₂a iudiciis tuis non declinavi quia tu legem posuisti mihi

₁₀₃quam dulcia faucibus meis eloquia tua super mel ori meo

₁₀₄a mandatis tuis intellexi propterea odivi omnem viam iniquitatis

₁₀₅Lucerna pedibus meis verbum tuum et lumen semitis meis

₁₀₆iuravi et statui custodire iudicia iustitiae tuae

₁₀₇humiliatus sum usquequaque Domine

vivifica me secundum verbum tuum

₁₀₈voluntaria oris mei beneplacita fac Domine

et iudicia tua doce me

₁₀₉anima mea in manibus meis semper

et legem tuam non sum oblitus

₁₁₀posuerunt peccatores laqueum mihi et de mandatis tuis non erravi

₁₁₁hereditate adquisivi testimonia tua in aeternum

quia exultatio cordis mei sunt

₁₁₂inclinavi cor meum ad faciendas iustificationes tuas in aeternum

propter retributionem

₁₁₃Iniquos odio habui et legem tuam dilexi

₁₁₄adiutor meus et susceptor meus es tu

in verbum tuum supersperavi

₁₁₅declinate a me maligni et scrutabor mandata Dei mei

₁₁₆suscipe me secundum eloquium tuum et vivam

et non confundas me ab expectatione mea

₁₁₇adiuva me et salvus ero

et meditabor in iustificationibus tuis semper

₁₁₈sprevisti omnes discedentes a

iustitiis tuis

quia iniusta cogitatio eorum

₁₁₉praevaricantes reputavi omnes peccatores terrae

ideo dilexi testimonia tua

₁₂₀confige timore tuo carnes meas a iudiciis ÷enim: tuis timui

₁₂₁Feci iudicium et iustitiam

non tradas me calumniantibus me

₁₂₂suscipe servum tuum in bonum non calumnientur me superbi

₁₂₃oculi mei defecerunt in salutare tuum

et in eloquium iustitiae tuae

₁₂₄fac cum servo tuo secundum misericordiam tuam

et iustificationes tuas doce me

₁₂₅servus tuus sum ego

da mihi intellectum et sciam testimonia tua

₁₂₆tempus faciendi Domino dissipaverunt legem tuam

₁₂₇ideo dilexi mandata tua super aurum et topazion

₁₂₈propterea ad omnia mandata tua dirigebar

omnem viam iniquam odio habui

₁₂₉Mirabilia testimonia tua ideo scrutata est ea anima mea

₁₃₀declaratio sermonum tuorum inluminat

et intellectum dat parvulis

₁₃₁os meum aperui et adtraxi spiritum quia mandata tua desiderabam

₁₃₂aspice in me et miserere mei

secundum iudicium diligentium nomen tuum

₁₃₃gressus meos dirige secundum eloquium tuum

et non dominetur mei omnis iniustitia

₁₃₄redime me a calumniis hominum et custodiam mandata tua

₁₃₅faciem tuam inlumina super servum tuum

et doce me iustificationes tuas

₁₃₆exitus aquarum deduxerunt oculi mei

quia non custodierunt legem tuam

₁₃₇Iustus es Domine et rectum iudicium tuum

₁₃₈mandasti iustitiam testimonia tua et veritatem tuam nimis

₁₃₉tabescere me fecit zelus meus

quia obliti sunt verba tua inimici mei

₁₄₀ignitum eloquium tuum vehementer et servus tuus dilexit illud

₁₄₁adulescentulus sum ego et contemptus

iustificationes tuas non sum oblitus

₁₄₂iustitia tua iustitia in aeternum et lex tua veritas

₁₄₃tribulatio et angustia invenerunt me

mandata tua meditatio mea

₁₄₄aequitas testimonia tua in aeternum

intellectum da mihi et vivam

₁₄₅Clamavi in toto corde exaudi me Domine

iustificationes tuas requiram

₁₄₆clamavi te salvum me fac

et custodiam mandata tua

₁₄₇praeveni in maturitate et clamavi

in verba tua supersperavi

₁₄₈praevenerunt oculi mei ad diluculum

ut meditarer eloquia tua

₁₄₉vocem meam audi secundum misericordiam tuam Domine

secundum iudicium tuum vivifica me

₁₅₀adpropinquaverunt persequentes me iniquitate

a lege autem tua longe facti sunt

₁₅₁prope es tu Domine et omnes viae tuae veritas

₁₅₂initio cognovi de testimoniis tuis quia in aeternum fundasti ea

₁₅₃Vide humilitatem meam et eripe me

quia legem tuam non sum oblitus

₁₅₄iudica iudicium meum et redime me

propter eloquium tuum vivifica me

₁₅₅longe a peccatoribus salus

quia iustificationes tuas non exquisierunt

₁₅₆misericordiae tuae multae Domine

secundum iudicia tua vivifica me

₁₅₇multi qui persequuntur me et tribulant me

a testimoniis tuis non declinavi

₁₅₈vidi praevaricantes et tabescebam

quia eloquia tua non custodierunt

₁₅₉vide quoniam mandata tua dilexi Domine

in misericordia tua vivifica me

₁₆₀principium verborum tuorum veritas

et in aeternum omnia iudicia iustitiae tuae

₁₆₁Principes persecuti sunt me gratis

et a verbis tuis formidavit cor meum

₁₆₂laetabor ego super eloquia tua sicut qui invenit spolia multa

₁₆₃iniquitatem odio habui et abominatus sum

legem autem tuam dilexi

₁₆₄septies in die laudem dixi tibi super iudicia iustitiae tuae

₁₆₅pax multa diligentibus legem tuam et non est illis scandalum

₁₆₆expectabam salutare tuum Domine et mandata tua dilexi

₁₆₇custodivit anima mea testimonia tua

et dilexi ea vehementer

₁₆₈servavi mandata tua et testimonia tua

quia omnes viae meae in conspectu tuo

₁₆₉Adpropinquet deprecatio mea in conspectu tuo Domine

iuxta eloquium tuum da mihi intellectum

₁₇₀intret postulatio mea in conspectu tuo

secundum eloquium tuum eripe me

₁₇₁eructabunt labia mea hymnum

cum docueris me iustificationes tuas

₁₇₂pronuntiabit lingua mea eloquium tuum

quia omnia mandata tua aequitas

₁₇₃fiat manus tua ut salvet me quoniam mandata tua elegi

₁₇₄concupivi salutare tuum Domine

et lex tua meditatio mea

₁₇₅vivet anima mea et laudabit te et iudicia tua adiuvabunt me

₁₇₆erravi sicut ovis quae periit

quaere servum tuum quia mandata tua non sum oblitus