PSALMI IUXTA LXX 100

Misericordiam et iudicium cantabo tibi Domine

psallam

₂et intellegam in via inmaculata quando venies ad me

perambulabam in innocentia cordis mei

in medio domus meae

₃non proponebam ante oculos meos rem iniustam

facientes praevaricationes odivi

non adhesit mihi

₄cor pravum

declinante a me maligno non cognoscebam

₅detrahentem secreto proximo suo hunc persequebar

superbo oculo et insatiabili corde cum hoc non edebam

₆oculi mei ad fideles terrae ut sederent mecum

ambulans in via inmaculata hic mihi ministrabat

₇non habitabat in medio domus meae qui facit

superbiam

qui loquitur iniqua non direxit in conspectu oculorum meorum

₈in matutino interficiebam omnes peccatores terrae

ut disperderem de civitate Domini omnes operantes iniquitatem