LIBER SAPIENTIAE 15

₁tu autem Deus noster suavis et verus es

patiens et misericordia disponens omnia

₂etenim si peccaverimus tui sumus scientes magnitudinem tuam

et si non peccaverimus scimus quoniam apud te sumus conputati

₃nosse enim te consummata iustitia est

et scire iustitiam et virtutem tuam radix est inmortalitatis

₄non enim in errorem induxit nos hominum malae artis excogitatio

nec umbra picturae labor sine fructu

effigies sculpta per varios colores

₅cuius aspectus insensato dat concupiscentiam

et diligit mortuae imaginis effigiem sine anima

₆malorum amatores digni qui spem in talibus habent

et qui faciunt illos et qui diligunt et qui colunt

₇sed et figulus mollem terram premens laboriose

fingit ad usus nostros unumquodque vas

et de eodem luto fingit quae munda sunt in usum vasa

similiter et quae his sunt contraria

horum autem vasorum qui sit usus iudex est figulus

₈et cum labore vanum deum de eodem fingit luto

ille qui paulo ante de terra factus fuerat

et post pusillum se ducit unde

acceptus est

repetitus debitum animae quem habebat

₉sed est illi cura non quia laboraturus

est

nec quoniam brevis illi vita est

sed concertatur aurificibus et argentariis

sed et aerarios imitatur et gloriam praefert

quoniam res supervacuas fingit

₁₀cinis est cor eius

et terra supervacua spes illius et luto vilior vita illius

₁₁quoniam ignoravit qui se finxit

et qui inspiravit illi animam quae operatur

et qui insuflavit

spiritum vitalem

₁₂sed aestimaverunt ludum

esse vitam nostram

et conversationem vitae conpositam ad lucrum

et oportere undecumque etiam ex malo adquirere

₁₃hic enim super omnes scit se delinquere

qui ex terrae materia fragilia vasa et sculptilia fingit

₁₄omnes enim insipientes et infelices supra modum animae superbi sunt

inimici populi tui et imperantes illi

₁₅quoniam omnia idola nationum aestimaverunt deos

quibus neque oculorum visus est ad videndum

neque nares ad percipiendum spiritum

neque aures ad audiendum

nec digiti manuum ad tractandum

sed et pedes eorum pigri ad ambulandum

₁₆homo enim fecit illos

et qui spiritum mutuatus est is finxit illos

nemo enim sibi similem homo poterit deum fingere

₁₇cum sit enim mortalis mortuum fingit manibus iniquis

melior est enim ipse his quos colit

quia ipse quidem vixit cum esset mortalis illi autem numquam

₁₈sed et animalia miserrima colunt

insensate enim conparata his aliis sunt

deteriora

₁₉sed nec aspectu aliquis ex his animalibus bona potest conspicere

effugit autem Dei laudem et benedictionem eius