LIBER SAPIENTIAE 12

₁bonus enim spiritus tuus est in omnibus

₂propter quod hos qui exerrant partibus

corripis

et de quibus peccant admonens adloqueris

ut relicta malitia credant in te Domine

₃et illos enim antiquos inhabitatores sanctae tuae terrae odiens

₄quoniam odibilia tibi opera faciebant

per medicamina et sacrificia iniusta

₅et filiorum necatores sine misericordia

et comestores viscerum hominum

devorationem et sanguinis a

medio sacramento tuo

₆et auctores parentes animarum inauxiliatarum

voluisti perdere per manus parentum nostrorum

₇ut dignam perciperent peregrinationem

puerorum Dei

quae tibi omnium carior est terra

₈sed et his tamquam hominibus pepercisti

et misisti antecessores exercitus tui vespas

ut illos paulatim exterminarent

₉non quia inpotens eras in bello subicere impios iustis

aut bestiis saevis aut verbo duro simul exterminare

₁₀sed partibus iudicans dabas locum paenitentiae

non ignorans quoniam nequa est natio illorum

et naturalis malitia ipsorum

et quoniam non poterat mutari cogitatio illorum in perpetuum

₁₁semen enim erat maledictum ab initio

nec timens aliquem veniam dabas peccatis illorum

₁₂quis enim dicet tibi quid fecisti

aut quis stabit contra iudicium tuum

aut quis in conspectum tuum veniet

vindex iniquorum hominum

aut quis tibi inputabit

si nationes perierint quas tu fecisti

₁₃nec enim est alius Deus quam tu

cuius cura est de omnibus

ut ostendas quoniam non iniuste iudicasti

₁₄neque rex neque tyrannus in conspectu tuo

inquirent de his quos perdidisti

₁₅cum sis ergo iustus iuste omnia disponis

ipsum quoque qui non debet puniri condemnas

exterum aestimas a tua virtute

₁₆virtus enim tua iustitiae initium est

et ob hoc quod omnium Dominus es

omnibus te parcere facis

₁₇virtutem enim ostendis tu

qui non crederis esse in virtute

consummatus

et hos qui sciunt audaciam traducis

₁₈tu autem dominator virtutis cum tranquillitate iudicas

et cum magna reverentia disponis nos

subest enim tibi cum voles posse

₁₉docuisti autem populum tuum per talia opera

quoniam oportet iustum esse et humanum

et bonae spei fecisti filios tuos

quoniam das locum in peccatis paenitentiae

₂₀si enim inimicos servorum tuorum et debitos morti

cum tanta cruciasti adtentione et liberasti

dans tempus et locum

per quae possint mutari a

malitia

₂₁cum quanta diligentia iudicasti filios tuos

quorum parentibus iuramenta et conventiones dedisti bonarum promissionum

₂₂cum ergo nobis disciplinam das

inimicos nostros multipliciter flagellas

ut bonitatem tuam cogitemus iudicantes

et cum de nobis iudicatur speremus misericordiam

₂₃unde et illis qui in vita sua insensate et iniuste vixerunt

per haec quae coluerunt dedisti summa tormenta

₂₄etenim in erroris via diutius erraverunt

deos aestimantes haec quae in animalibus sunt supervacua

infantum insensatorum more viventes

₂₅propter hoc tamquam pueris insensatis iudicium in derisum dedisti

₂₆qui autem ludibriis increpationis non correpti sunt

dignum Dei iudicium experti sunt

₂₇in his enim quae patiebantur moleste ferebant

in quibus patientes indignabantur

per haec quos putabant deos in ipsis cum exterminarentur

videntes illum quem olim negabant se nosse

Deum verum agnoverunt

propter quod et finis condemnationis illis veniet