LIBER RUTH 3

₁postquam autem reversa est ad socrum suam audivit ab ea

filia mi quaeram tibi requiem et providebo ut bene sit tibi

₂Booz iste cuius puellis in agro iuncta es propinquus est noster

et hac nocte aream hordei ventilat

₃lava igitur et unguere et induere cultioribus

vestimentis

ac descende in aream

non te videat homo donec esum potumque finierit

₄quando autem ierit ad dormiendum nota locum in quo dormiat

veniesque et discoperies pallium quo operitur a parte pedum

et proicies te et ibi iacebis

ipse autem dicet tibi quid agere debeas

₅quae respondit quicquid praeceperis faciam

₆descenditque in aream et fecit omnia quae sibi imperaverat socrus

₇cumque comedisset Booz et bibisset et factus esset hilarior

issetque ad dormiendum iuxta acervum manipulorum

venit abscondite et discoperto a pedibus eius pallio se proiecit

₈et ecce nocte iam media expavit homo et conturbatus est

viditque mulierem iacentem ad pedes suos

₉et ait illi quae es

illaque respondit ego sum Ruth ancilla tua

expande pallium tuum super famulam tuam quia propinquus es

₁₀et ille benedicta inquit es Domino filia

et priorem misericordiam posteriore superasti

quia non es secuta iuvenes pauperes sive divites

₁₁noli ergo metuere sed quicquid dixeris mihi faciam tibi

scit enim omnis populus qui habitat intra portas urbis meae

mulierem te esse virtutis

₁₂nec abnuo me propinquum sed est alius me propinquior

₁₃quiesce hac nocte

et facto mane si te voluerit propinquitatis iure retinere

bene res acta est

sin autem ille noluerit

ego te absque ulla dubitatione suscipiam vivit Dominus

dormi usque mane

₁₄dormivit itaque ad pedes eius usque ad noctis abscessum

surrexitque antequam homines se cognoscerent mutuo

et dixit Booz cave ne quis noverit quod huc veneris

₁₅et rursum expande inquit palliolum tuum quo operiris

et tene utraque manu

qua extendente et tenente mensus est sex modios hordei

et posuit super eam

quae portans ingressa est civitatem

₁₆et venit ad socrum suam

quae dixit ei quid egisti filia

narravitque ei omnia quae sibi fecisset homo

₁₇et ait

ecce sex modios hordei dedit mihi et ait

nolo vacuam te reverti ad socrum tuam

₁₈dixitque Noemi expecta filia donec videamus quem res exitum habeat

neque enim cessabit homo nisi conpleverit quod locutus est