PSALMI IUXTA HEBR. 77

₁eruditionis Asaph

ausculta populus meus legem meam

inclinate aurem vestram ad verba oris mei

₂aperiam in parabula os meum loquar enigmata antiqua

₃quae audivimus et cognovimus et patres nostri narraverunt nobis

₄non sunt abscondita a filiis eorum a generatione sequenti

narrante laudes Domini et potentiam eius

et mirabilia eius quae fecit

₅statuit contestationem Iacob et legem posuit in Israhel

quae mandavit patribus nostris ut docerent filios suos

₆ut cognosceret generatio subsequens

filii nascituri surgent et narrabunt filiis suis

₇ut ponant in Deo spem suam

et non obliviscantur cogitationum eius

et mandata eius custodiant

₈ut non sint sicut patres eorum

generatio declinans et provocans

generatio quae non praeparavit cor suum

et non credidit Deo spiritus eius

₉filii Efraim intendentes et mittentes arcum

terga verterunt in die belli

₁₀non custodierunt pactum Dei sui

et in lege eius noluerunt ingredi

₁₁et obliti sunt commutationum eius

et mirabilium eius quae ostendit eis

₁₂coram patribus eorum fecit mirabilia

in terra Aegypto in regione Taneos

₁₃divisit mare et transduxit eos

et stare fecit aquas quasi acervum

₁₄et duxit eos in nube per diem

et tota nocte in lumine ignis

₁₅scidit petram in deserto et potum dedit quasi de abyssis magnis

₁₆et eduxit rivos de petra et elicuit quasi flumina aquas

₁₇et addiderunt ultra peccare ei ut provocarent Excelsum in invio

₁₈et temptaverunt Deum in cordibus suis

petentes cibum animae suae

₁₉et loquentes contra Deum dicebant

numquid poterit Deus ponere mensam in solitudine

₂₀ecce percussit petram et fluxerunt aquae

et torrentes inundaverunt

numquid et panem poterit dare

aut praeparare carnem populo suo

₂₁ideo audivit Dominus et non distulit

et ignis accensus est in Iacob et furor ascendit in Israhel

₂₂quia non crediderunt Deo

nec habuerunt fiduciam in salutari eius

₂₃et praecepit nubibus desuper et portas caeli aperuit

₂₄et pluit super eos man ut comederent

et triticum caeli dedit eis

₂₅panem fortium comedit vir

cibaria misit eis in saturitatem

₂₆abstulit eurum de caelo

et induxit in fortitudine sua africum

₂₇et pluit super eos quasi pulverem carnes

et quasi harenam maris volatilia pinnata

₂₈et ceciderunt in medio castrorum eius

in circuitu tabernaculorum eius

₂₉et comederunt et saturati sunt nimis

et desiderium eorum adtulit eis

₃₀non indiguerunt de cupiditate sua

cum adhuc cibus esset in ore eorum

₃₁furor ergo Dei ascendit super eos

et occidit pingues eorum et electos Israhel incurvavit

₃₂in omnibus his peccaverunt ultra

et non crediderunt mirabilibus eius

₃₃et consumpsit in vanitate dies eorum et annos eorum velociter

₃₄si occidebat eos tunc requirebant eum

et convertebantur et diluculo consurgebant ad Deum

₃₅et recordabantur quia Deus fortitudo eorum

et Deus excelsus redemptor eorum

₃₆et lactaverunt eum in ore suo et lingua sua mentiti sunt ei

₃₇cor autem eorum non erat firmum cum eo

nec permanserunt in pacto eius

₃₈ipse vero misericors propitiabitur iniquitati et non disperdet

multumque avertit iram suam

et non suscitavit totum furorem suum

₃₉sed recordatus est quia caro essent spiritus vadens et non revertens

₄₀quotiens provocaverunt eum in deserto

adflixerunt eum in solitudine

₄₁et conversi sunt et temptaverunt Deum

et Sanctum Israhel concitaverunt

₄₂non sunt recordati manus eius

diei qua redemit eos a tribulante

₄₃qui fecit in Aegypto signa sua

et ostenta sua in regione Taneos

₄₄qui convertit in sanguine fluvios eorum

et rivos eorum ut non biberent

₄₅qui inmisit eis genus omne muscarum

ut comederent eos

et ranas ut disperderent eos

₄₆qui dedit brucho germen eorum et laborem eorum lucustae

₄₇qui occidit in grandine vineas eorum et sycomoros eorum in frigore

₄₈qui tradidit grandini pascua eorum

et iumenta eorum volucribus

₄₉qui misit in eos iram furoris sui

indignationem et comminationem et angustiam

inmissionem angelorum malorum

₅₀munivit semitam furori suo

non pepercit morti animae eorum

et animantia eorum pesti tradidit

₅₁et percussit omne primogenitum in Aegypto

principium partus in tabernaculis Cham

₅₂et tulit veluti oves populum suum

et minavit eos sicut gregem in deserto

₅₃et duxit eos cum fiducia et absque timore

inimicos autem eorum operuit mare

₅₄et adduxit eos ad terminum sanctificatum suum

montem istum quem possedit dextera eius

et eiecit a facie eorum gentes

et possidere eos fecit in funiculo hereditatem

₅₅et conlocavit in tabernaculis eorum tribus Israhel

₅₆et temptaverunt et provocaverunt Deum excelsum

et testimonia eius non custodierunt

₅₇et aversi sunt et praevaricati sunt ut patres eorum

incurvati sunt quasi arcus inutilis

₅₈et provocaverunt eum in excelsis suis

et in sculptilibus suis ad aemulandum concitaverunt

₅₉audivit Deus et non distulit

et proiecit vehementer Israhel

₆₀et reliquit tabernaculum Selo

tentorium quod conlocavit inter homines

₆₁tradidit in captivitatem gloriam suam

et decorem suum in manu hostis

₆₂et conclusit in gladio populum suum et in hereditate sua non distulit

₆₃iuvenes eius devoravit ignis et virgines eius nemo luxit

₆₄sacerdotes eius gladio ceciderunt et viduae eius non sunt

fletae

₆₅et evigilavit quasi dormiens Dominus

quasi fortis post crapulam vini

₆₆et percussit hostes suos retrorsum

obprobrium sempiternum dedit eos

₆₇et proiecit tabernaculum Ioseph et tribum Efraim non elegit

₆₈sed elegit tribum Iuda montem Sion quem dilexit

₆₉et aedificavit in similitudinem monoceroton

sanctuarium suum

quasi terram fundavit illud in saeculum

₇₀et elegit David servum suum et tulit eum de gregibus ovium

sequentem fetas adduxit eum

₇₁ut pasceret Iacob populum eius

et Israhel hereditatem eius

₇₂qui pavit eos in simplicitate cordis sui

et in prudentia manuum suarum dux eorum

fuit