PSALMI IUXTA HEBR. 128

₁canticum graduum

saepe expugnaverunt me ab adulescentia mea dicat nunc Israhel

₂saepe expugnaverunt me ab adulescentia mea

sed non potuerunt mihi

₃super cervicem meam arabant arantes

prolongaverunt sulcum suum

₄Dominus iustus concidet laqueos impiorum

₅confundantur et revertantur retrorsum

omnes qui oderunt Sion

₆fiant sicut faenum tectorum

quod statim ut viruerit arescet

₇de quo non implebit manum suam messor

et sinum suum manipulos faciens

₈de quo non dixerunt transeuntes benedictio Domini super vos

benediximus vobis in nomine Domini