PSALMI IUXTA HEBR. 118

₁aleph

beati inmaculati in via qui ambulant in lege Domini

₂beati qui custodiunt testimonia eius in toto corde requirunt eum

₃nec enim qui operantur iniquitatem in viis eius ambulaverunt

₄tu mandasti praecepta tua custodire nimis

₅utinam dirigantur viae meae ad custodienda praecepta tua

₆tunc non confundar cum respexero ad omnia mandata tua

₇confitebor tibi in directione cordis

cum didicero iudicia iustitiae tuae

₈praecepta tua custodiam ne derelinquas me nimis

₉beth in quo corrigit iuvenis semitam suam cum custodierit

verba tua

₁₀in toto corde meo exquisivi te

ne errare me facias a mandatis tuis

₁₁in corde meo abscondi eloquium tuum ut non peccem tibi

₁₂benedictus tu Domine doce me praecepta tua

₁₃in labiis meis narravi omnes iustitias oris tui

₁₄in via testimoniorum tuorum laetatus sum

quasi in omnibus divitiis

₁₅in praeceptis tuis meditabor et contemplabor semitas tuas

₁₆iustitiis tuis delectabor non obliviscar verba tua

₁₇gimel tribue servo tuo vivam et custodiam verba

tua

₁₈revela oculos meos et videbo mirabilia in

lege tua

₁₉advena ego sum in terra ne abscondas a me mandata tua

₂₀desideravit anima mea desiderare iudicia tua in omni tempore

₂₁increpasti superbos maledicti qui recedunt a mandatis tuis

₂₂aufer a me obprobrium et contemptum

quoniam testimonia tua custodivi

₂₃etenim sedentes principes adversum me loquebantur

servus autem tuus meditabatur praecepta tua

₂₄sed et testimonia tua voluntas mea

quasi viri amicissimi mei

₂₅deleth adhesit pulveri anima mea vivifica me iuxta verbum tuum

₂₆vias meas exposui et exaudisti doce me iustitiam tuam

₂₇viam praeceptorum tuorum fac me intellegere

et loquar in mirabilibus tuis

₂₈destillavit anima mea prae stultitia serva me iuxta eloquium tuum

₂₉viam mendacii aufer a me et legem tuam dona mihi

₃₀viam fidei elegi iudicia tua proponebam

₃₁adhesi testimoniis tuis Domine ne confundas me

₃₂viam mandatorum tuorum curram quoniam dilatasti cor meum

₃₃he ostende mihi Domine viam praeceptorum tuorum

et custodiam eam per vestigium

₃₄doce me et observabo legem tuam

et custodiam eam in toto corde

₃₅deduc me in semita mandatorum tuorum quia ipsam volui

₃₆inclina cor meum ad testimonia tua et non ad avaritiam

₃₇averte oculos meos ne videant vanitatem

in via tua vivifica me

₃₈suscita servo tuo eloquium tuum in timorem tuum

₃₉averte obprobrium meum quod reveritus sum iudicia tua bona

₄₀ecce desideravi praecepta tua

iustitia tua vivifica me

₄₁vav et veniant mihi misericordiae tuae Domine

et salus tua iuxta eloquium tuum

₄₂et respondebo exprobranti mihi sermonem

quia speravi in sermone tuo

₄₃et ne auferas de ore meo verbum veritatis usque nimis

quoniam iudicia tua expectavi

₄₄et custodiam legem tuam iugiter in sempiternum et ultra

₄₅et ambulabo in spatioso quia praecepta tua quaesivi

₄₆et loquar in testimoniis tuis coram regibus et non confundar

₄₇et delectabor in mandatis tuis quae dilexi

₄₈et levabo manus meas ad mandata tua quae dilexi

et loquar in praeceptis tuis

₄₉zai memento sermonis servo tuo quem me sperare fecisti

₅₀haec est consolatio mea in adflictione mea

quia eloquium tuum vivificavit me

₅₁superbi deridebant me nimis a lege tua non declinavi

₅₂recordatus sum iudiciorum tuorum a saeculo Domine

et consolatus sum

₅₃horror obtinuit me ab impiis

qui dereliquerunt legem tuam

₅₄carmina erant mihi praecepta tua in domo peregrinationis meae

₅₅recordatus sum in nocte nominis tui Domine

et custodivi legem tuam

₅₆hoc factum est mihi quia praecepta tua custodivi

₅₇heth pars mea Domine dixi ut custodiam verbum

tuum

₅₈deprecatus sum vultum tuum in toto corde

miserere mei secundum eloquium tuum

₅₉recogitavi vias meas

et converti pedes meos ad testimonia tua

₆₀festinavi et non neglexi custodire mandata tua

₆₁funes impiorum inplicaverunt me

legem tuam non sum oblitus

₆₂medio noctis surgam ad confitendum tibi

super iudicia iustificationis tuae

₆₃particeps ego sum omnium timentium te

et custodientium praecepta tua

₆₄misericordia tua conpleta est terra

praecepta tua doce me

₆₅teth benefecisti servo tuo Domine secundum

verbum tuum

₆₆bonum sermonem et scientiam doce me quia mandatis tuis credidi

₆₇antequam audirem ego ignoravi

nunc autem eloquium tuum custodivi

₆₈bonus tu et beneficus doce me praecepta tua

₆₉adplicabant mihi mendacium superbi

ego autem in toto corde servabam praecepta tua

₇₀incrassatum est velut adeps cor eorum

et ego in lege tua delectabar

₇₁bonum mihi quia adflictus sum ut discerem praecepta tua

₇₂melior mihi est lex oris tui super milia auri et argenti

₇₃ioth manus tuae fecerunt me et firmaverunt me

doce me et discam mandata tua

₇₄qui timent te videbunt me et laetabuntur

quia sermonem tuum expectavi

₇₅scio Domine quia iustum iudicium tuum et vere adflixisti me

₇₆sit obsecro misericordia tua in consolatione mea

sicut locutus es servo tuo

₇₇veniant mihi misericordiae tuae et vivam

quia lex tua delectatio mea

₇₈confundantur superbi quoniam inique contriverunt me

ego autem loquar in praeceptis tuis

₇₉revertantur ad me qui timent te et qui sciunt testimonium tuum

₈₀fiat cor meum perfectum in praeceptis tuis ut non confundar

₈₁caph defecit in salutare tuum anima mea verbum tuum expectavi

₈₂consumpti sunt oculi mei in verbum tuum

dicentes quando consolaberis me

₈₃et cum essem quasi uter in pruinam

praecepta tua non sum oblitus

₈₄quot sunt dies servi tui

quando facies in persequentibus me iudicium

₈₅foderunt mihi superbi foveas quae non erant iuxta legem tuam

₈₆omnia mandata tua vera falso persecuti sunt me auxiliare mihi

₈₇paulo minus consumpserunt me in terra

ego autem non dimisi praecepta tua

₈₈secundum misericordiam tuam vivifica me

et custodiam testimonium oris tui

₈₉lameth in aeternum Domine verbum tuum perstat in caelo

₉₀in generatione et generatione fides tua fundasti terram et stat

₉₁iudicio tuo stant usque hodie quia omnia serviunt tibi

₉₂nisi quod lex tua delectatio mea

forte perissem in pressura mea

₉₃in sempiternum non obliviscar praeceptorum tuorum

quia per ipsa vivificasti me

₉₄tuus ego sum salva me quoniam praecepta tua quaesivi

₉₅me expectaverunt impii ut perderent me

testimonium tuum considerabo

₉₆omni consummationi vidi finem latum mandatum tuum nimis

₉₇mem quam dilexi legem tuam tota die haec meditatio mea

₉₈super inimicos meos instruis me mandata tua

quia in sempiternum hoc est mihi

₉₉super omnes qui docebant me eruditus sum

quia testimonia tua meditatio mea

₁₀₀super senes intellexi quia praecepta tua servavi

₁₀₁ab omni semita mala prohibui pedes meos

ut custodirem verba tua

₁₀₂a iudiciis tuis non recessi quia tu inluminasti me

₁₀₃quam dulce gutturi meo eloquium tuum super mel ori meo

₁₀₄praecepta tua considerabam

propterea odivi omnem semitam mendacii

₁₀₅nun lucerna pedi meo verbum tuum et lux semitae meae

₁₀₆iuravi et perseverabo ut custodiam iudicia iustitiae tuae

₁₀₇adflictus sum usque nimis Domine vivifica me iuxta verbum tuum

₁₀₈voluntaria oris mei conplaceant tibi Domine

et secundum iudicia tua doce me

₁₀₉anima mea in manu mea semper et legis tuae non sum oblitus

₁₁₀posuerunt impii laqueum mihi et a praeceptis tuis non aberravi

₁₁₁hereditas mea testimonia tua in sempiternum

quia gaudium cordis mei sunt

₁₁₂inclinavi cor meum ut facerem iustitias tuas

propter aeternam retributionem

₁₁₃samech tumultuosos odivi et legem tuam dilexi

₁₁₄protectio mea et scutum meum tu es verbum tuum expectavi

₁₁₅recedite a me maligni et custodiam mandata Dei mei

₁₁₆confirma me secundum verbum tuum et vivam

et noli me confundere ab expectatione mea

₁₁₇auxiliare mihi et salvus ero et delectabor in praeceptis tuis iugiter

₁₁₈abiecisti omnes qui adversantur praecepta tua

quia mendax cogitatio eorum

₁₁₉quasi scoriam conputasti omnes impios terrae

propterea dilexi testimonia tua

₁₂₀horripilavit a timore tuo caro mea et iudicia tua timui

₁₂₁ain feci iudicium et iustitiam

ne derelinquas me his qui calumniantur me

₁₂₂sponde pro servo tuo in bonum

ne calumnientur me superbi

₁₂₃oculi mei defecerunt in salutare tuum

et in eloquium iustitiae tuae

₁₂₄fac cum servo tuo iuxta misericordiam tuam

et praecepta tua doce me

₁₂₅servus tuus ego instrue me et cognoscam testimonia tua

₁₂₆tempus est ut facias Domine praevaricati sunt legem tuam

₁₂₇propterea dilexi mandata tua super aurum et topazium

₁₂₈propterea in universa praecepta direxi

omnem semitam mendacii odio habui

₁₂₉fe mirabilia testimonia tua idcirco custodivit ea anima mea

₁₃₀ostium sermonum tuorum lucidum doce parvulos

₁₃₁os meum aperui et respiravi quia mandata tua desiderabam

₁₃₂respice ad me et miserere mei

iuxta iudicium diligentium nomen tuum

₁₃₃gressus meos firma in sermone tuo

et non des potestatem in me universae iniquitati

₁₃₄redime me a calumnia hominis

et custodiam praecepta tua

₁₃₅vultum tuum ostende servo tuo et doce me praecepta tua

₁₃₆rivi aquarum fluebant de oculis meis

quia non custodierunt legem tuam

₁₃₇sade iustus es Domine et rectum iudicium tuum

₁₃₈praecepisti iustitiam testimonii tui et veritatem nimis

₁₃₉consumpsit me zelus meus

quia obliti sunt verborum tuorum hostes mei

₁₄₀probatus sermo tuus nimis et servus tuus dilexit illum

₁₄₁parvulus ego sum et contemptibilis

sed praecepta tua non sum oblitus

₁₄₂iustitia tua iustitia sempiterna et lex tua veritas

₁₄₃tribulatio et angustia invenerunt me mandata tua voluntas mea

₁₄₄iusta testimonia tua semper doce me et vivam

₁₄₅coph clamavi in toto corde exaudi me Domine

praecepta tua custodiam

₁₄₆invocavi te salvum me fac et custodiam testimonia tua

₁₄₇surgebam adhuc in tenebris et clamabam

verbum tuum expectans

₁₄₈praeveniebant oculi mei vigilias ut meditarer in sermonibus tuis

₁₄₉vocem meam audi iuxta misericordiam tuam Domine

secundum iudicium tuum vivifica me

₁₅₀adpropinquaverunt persecutores mei sceleri

et a lege tua procul facti sunt

₁₅₁prope es tu Domine et omnia mandata tua veritas

₁₅₂a principio novi de testimoniis tuis

quod in aeternum fundaveris ea

₁₅₃res vide adflictionem meam et eripe me

quia legis tuae non sum oblitus

₁₅₄iudica causam meam et redime me sermone tuo vivifica me

₁₅₅longe ab impiis salus quia praecepta tua non quaesierunt

₁₅₆misericordiae tuae multae Domine iuxta iudicia tua vivifica me

₁₅₇multi qui persequuntur me et adfligunt me

a testimoniis tuis non declinavi

₁₅₈vidi praevaricatores tuos et maerebam

qui verbum tuum non custodierunt

₁₅₉vide quoniam praecepta tua dilexi Domine

iuxta misericordiam tuam vivifica me

₁₆₀caput verborum tuorum veritas

et sempiternum omne iudicium iustitiae tuae

₁₆₁sen principes persecuti sunt me sine causa

verba autem tua timuit cor meum

₁₆₂gaudens ego sum in eloquio tuo sicut qui invenit spolia multa

₁₆₃mendacium odio habui et detestatus sum

legem autem tuam dilexi

₁₆₄septies in die laudavi te super iudiciis iustitiae tuae

₁₆₅pax multa diligentibus legem tuam et non est illis scandalum

₁₆₆expectavi salutare tuum Domine et mandata tua feci

₁₆₇custodivit anima mea testimonia tua

et dilexi ea nimis

₁₆₈custodivi praecepta tua et testimonia tua

quia omnes viae meae in conspectu tuo

₁₆₉thau ingrediatur laus mea coram te Domine

secundum verbum tuum doce me

₁₇₀veniat deprecatio mea ante vultum tuum

secundum eloquium tuum libera me

₁₇₁fundant labia mea hymnum docebis enim me praecepta tua

₁₇₂loquetur lingua mea sermonem tuum

quia omnia mandata tua iusta

₁₇₃sit manus tua auxiliatrix mea quia praecepta tua elegi

₁₇₄desideravi salutare tuum Domine et lex tua voluntas mea

₁₇₅vivet anima mea et laudabit te

et iudicia tua auxiliabuntur mihi

₁₇₆erravi quasi ovis perdita

quaere servum tuum quia mandatorum tuorum non sum oblitus