LIBER NUMERORUM 23

₁dixitque Balaam ad Balac aedifica mihi hic septem aras

et para totidem vitulos eiusdemque numeri arietes

₂cumque fecisset iuxta sermonem Balaam

inposuerunt simul vitulum et arietem super aram

₃dixitque Balaam ad Balac

sta paulisper iuxta holocaustum tuum donec vadam

si forte occurrat mihi Dominus

et quodcumque imperaverit loquar tibi

₄cumque abisset velociter occurrit ei Deus

locutusque ad eum Balaam

septem inquit aras erexi et inposui vitulum et arietem desuper

₅Dominus autem posuit verbum in ore eius et ait

revertere ad Balac et haec loqueris

₆reversus invenit stantem Balac iuxta holocaustum suum

et omnes principes Moabitarum

₇adsumptaque parabola sua dixit

de Aram adduxit me Balac rex Moabitarum de montibus orientis

veni inquit et maledic Iacob propera et detestare Israhel

₈quomodo maledicam cui non maledixit Deus

qua ratione detester quem Dominus non detestatur

₉de summis silicibus videbo eum et de collibus considerabo illum

populus solus habitabit et inter gentes non reputabitur

₁₀quis dinumerare possit pulverem Iacob

et nosse numerum stirpis Israhel

moriatur anima mea morte iustorum

et fiant novissima mea horum similia

₁₁dixitque Balac ad Balaam quid est hoc quod agis

ut malediceres inimicis vocavi te

et tu e contrario benedicis eis

₁₂cui ille respondit num aliud possum loqui nisi quod iusserit Dominus

₁₃dixit ergo Balac veni mecum in alterum locum

unde partem Israhelis videas et totum videre non possis

inde maledicito ei

₁₄cumque duxisset eum in locum sublimem super verticem montis Phasga

aedificavit Balaam septem aras

et inpositis supra vitulo atque ariete

₁₅dixit ad Balac

sta hic iuxta holocaustum tuum donec ego pergam obvius

₁₆cui cum Dominus occurrisset

posuissetque verbum in ore eius ait

revertere ad Balac et haec loqueris ei

₁₇reversus invenit eum stantem iuxta holocaustum suum

et principes Moabitarum cum eo

ad quem Balac quid inquit locutus est Dominus

₁₈at ille adsumpta parabola sua ait

sta Balac et ausculta audi fili Sepphor

₁₉non est Deus quasi homo ut mentiatur

nec ut filius hominis ut mutetur

dixit ergo et non faciet locutus est et non implebit

₂₀ad benedicendum adductus sum benedictionem prohibere non valeo

₂₁non est idolum in Iacob nec videtur simulacrum in Israhel

Dominus Deus eius cum eo est et clangor victoriae regis in illo

₂₂Deus eduxit eum de Aegypto

cuius fortitudo similis est rinocerotis

₂₃non est augurium in Iacob nec divinatio in Israhel

temporibus suis dicetur Iacob et Israheli

quid operatus sit Deus

₂₄ecce populus ut leaena consurget et quasi leo erigetur

non accubabit donec devoret praedam et occisorum sanguinem bibat

₂₅dixitque Balac ad Balaam nec maledicas ei nec benedicas

₂₆et ille nonne ait dixi tibi

quod quicquid mihi Deus imperaret hoc facerem

₂₇et ait Balac ad eum veni et ducam te ad alium locum

si forte placeat Deo ut inde maledicas eis

₂₈cumque duxisset eum super verticem montis Phogor qui respicit

solitudinem

₂₉dixit ei Balaam aedifica mihi hic septem aras

et para totidem vitulos eiusdemque numeri arietes

₃₀fecit Balac ut Balaam dixerat

inposuitque vitulos et arietes per singulas aras