LIBER LEVITICI 18

₁locutusque est Dominus ad Mosen dicens

₂loquere filiis Israhel et dices ad eos ego Dominus Deus vester

₃iuxta consuetudinem terrae Aegypti in qua habitastis non facietis

et iuxta morem regionis Chanaan ad quam ego introducturus sum vos non agetis

nec in legitimis eorum ambulabitis

₄facietis iudicia mea et praecepta servabitis et ambulabitis

in eis

ego Dominus Deus vester

₅custodite leges meas atque iudicia

quae faciens homo vivet in eis ego Dominus

₆omnis homo ad proximam sanguinis sui non accedet

ut revelet turpitudinem eius ego Dominus

₇turpitudinem patris et turpitudinem matris tuae non discoperies

mater tua est non revelabis turpitudinem eius

₈turpitudinem uxoris patris tui non discoperies

turpitudo enim patris tui est

₉turpitudinem sororis tuae ex patre sive ex matre quae domi vel foris

genita est non revelabis

₁₀turpitudinem filiae filii tui vel neptis ex filia non revelabis

quia turpitudo tua est

₁₁turpitudinem filiae uxoris patris tui quam peperit patri tuo et est

soror tua non revelabis

₁₂turpitudinem sororis patris tui non discoperies

quia caro est patris tui

₁₃turpitudinem sororis matris tuae non revelabis

eo quod caro sit matris tuae

₁₄turpitudinem patrui tui non revelabis

nec accedes ad uxorem eius quae tibi adfinitate coniungitur

₁₅turpitudinem nurus tuae non revelabis quia uxor filii tui est

nec discoperies ignominiam eius

₁₆turpitudinem uxoris fratris tui non revelabis

quia turpitudo fratris tui est

₁₇turpitudinem uxoris tuae et filiae eius non revelabis

filiam filii eius et filiam filiae illius non sumes

ut reveles ignominiam eius

quia caro illius sunt et talis coitus incestus est

₁₈sororem uxoris tuae in pelicatum illius non accipies

nec revelabis turpitudinem eius adhuc illa vivente

₁₉ad mulierem quae patitur menstrua non accedes

nec revelabis foeditatem eius

₂₀cum uxore proximi tui non coibis

nec seminis commixtione maculaberis

₂₁de semine tuo non dabis ut consecretur idolo Moloch

nec pollues nomen Dei tui ego Dominus

₂₂cum masculo non commisceberis coitu femineo

quia abominatio est

₂₃cum omni pecore non coibis nec maculaberis cum eo

mulier non subcumbet iumento nec miscebitur ei quia scelus est

₂₄ne polluamini in omnibus his

quibus contaminatae sunt universae gentes

quas ego eiciam ante conspectum vestrum

₂₅et quibus polluta est terra

cuius ego scelera visitabo ut evomat habitatores suos

₂₆custodite legitima mea atque iudicia

et non faciat ex omnibus

abominationibus istis

tam indigena quam colonus qui peregrinatur apud vos

₂₇omnes enim execrationes istas

fecerunt accolae terrae qui fuerunt ante vos et polluerunt eam

₂₈cavete ergo ne et vos similiter evomat cum paria feceritis

sicut evomuit gentem quae fuit ante vos

₂₉omnis anima quae fecerit de abominationibus his quippiam

peribit de medio populi sui

₃₀custodite mandata mea

nolite facere quae fecerunt hii qui fuerunt ante vos

et ne polluamini in eis

ego Dominus Deus vester