LIBER IOSUE 13

₁Iosue senex provectaeque aetatis erat

et dixit Dominus ad eum senuisti et longevus es

terraque latissima derelicta est quae necdum est sorte divisa

₂omnis videlicet Galilea Philisthim et universa Gesuri

₃a fluvio turbido qui inrigat Aegyptum

usque ad terminos Accaron contra aquilonem

terra Chanaan quae in quinque regulos Philisthim dividitur

Gazeos Azotios Ascalonitas Gettheos et Accaronitas

₄ad meridiem vero sunt Evei

omnis terra Chanaan et Maara Sidoniorum

usque Afeca et terminos Amorrei

₅eiusque confinia

Libani quoque regio contra orientem

a Baalgad sub monte Hermon donec ingrediaris Emath

₆omnium qui habitant in monte

a Libano usque ad aquas Masrefoth

universique Sidonii

ego sum qui delebo eos a facie filiorum Israhel

veniat ergo in parte hereditatis Israhel sicut

praecepi tibi

₇et nunc divide terram in possessionem

novem tribubus et dimidiae tribui Manasse

₈cum qua Ruben et Gad possederunt terram

quam tradidit eis Moses famulus Domini

trans fluenta Iordanis ad orientalem plagam

₉ab Aroer quae sita est in ripa torrentis Arnon et in vallis medio

universaque campestria Medaba usque Dibon

₁₀et cunctas civitates Seon regis Amorrei qui regnavit in Esebon

usque ad terminos filiorum Ammon

₁₁et Galaad ac terminum Gesuri et Machathi

omnemque montem Hermon

et universam Basan usque Saleca

₁₂omne regnum Og in Basan

qui regnavit in Astharoth et Edraim

ipse fuit de reliquiis Rafaim percussitque eos Moses atque delevit

₁₃nolueruntque disperdere filii Israhel Gesuri et Machathi

et habitaverunt in medio Israhel usque in praesentem diem

₁₄tribui autem Levi non dedit possessionem

sed sacrificia et victimae Domini Dei Israhel

ipsa est eius hereditas sicut locutus est illi

₁₅dedit ergo Moses possessionem tribui filiorum Ruben iuxta cognationes

suas

₁₆fuitque terminus eorum

ab Aroer quae sita est in ripa torrentis Arnon

et in valle eiusdem torrentis media

universam planitiem quae ducit Medaba

₁₇et Esebon

cunctosque viculos earum qui sunt in campestribus

Dibon quoque et Bamothbaal et oppidum Baalmaon

₁₈Iessa et Cedmoth et Mepheeth

₁₉Cariathaim et Sebama et Sarathasar in monte convallis

₂₀Bethpheor et Asedothphasga et Bethaisimoth

₂₁omnes urbes campestres

universaque regna Seon regis Amorrei qui regnavit in Esebon

quem percussit Moses cum principibus Madian

Eveum et Recem et Sur et Ur et Rabee duces Seon habitatores

terrae

₂₂et Balaam filium Beor ariolum occiderunt filii Israhel gladio cum

ceteris interfectis

₂₃factusque est terminus filiorum Ruben Iordanis fluvius

haec est possessio Rubenitarum per cognationes suas urbium et viculorum

₂₄deditque Moses tribui Gad et filiis eius

per cognationes suas possessionem

cuius haec divisio est

₂₅terminus Iazer et omnes civitates Galaad dimidiamque

partem terrae filiorum Ammon

usque ad Aroer quae est contra Rabba

₂₆et ab Esebon usque Ramoth Masphe et Batanim

et a Manaim usque ad terminos Dabir

₂₇in valle quoque Betharaam et Bethnemra et Soccoth et Saphon

reliquam partem regni Seon regis Esebon

huius quoque Iordanis finis est

usque ad extremam partem maris Chenereth

trans Iordanem ad orientalem plagam

₂₈haec est possessio filiorum Gad per familias suas

civitates et villae earum

₂₉dedit et dimidiae tribui Manasse filiisque eius

iuxta cognationes suas possessionem

₃₀cuius hoc principium est

a Manaim universam Basan et cuncta regna Og regis Basan

omnesque vicos Air qui sunt in Basan

sexaginta oppida

₃₁et dimidiam partem Galaad

Astharoth et Edrai urbes regni Og in Basan

filiis Machir filii Manasse

dimidiae parti filiorum Machir iuxta cognationes suas

₃₂hanc possessionem divisit Moses in campestribus Moab

trans Iordanem contra Hiericho ad orientalem plagam

₃₃tribui autem Levi non dedit possessionem

quoniam Dominus Deus Israhel ipse est possessio eius

ut locutus est illi