LIBER IOB 17

₁spiritus meus adtenuabitur dies mei breviabuntur

et solum mihi superest sepulchrum

₂non peccavi et in amaritudinibus moratur oculus meus

₃libera me et pone iuxta te

et cuiusvis manus pugnet contra me

₄cor eorum longe fecisti a disciplina

et propterea non exaltabuntur

₅praedam pollicetur sociis et oculi filiorum eius deficient

₆posuit me quasi in proverbium vulgi

et exemplum sum coram eis

₇caligavit ab indignatione oculus meus

et membra mea quasi in nihili redacta sunt

₈stupebunt iusti super hoc

et innocens contra hypocritam suscitabitur

₉et tenebit iustus viam suam

et mundis manibus addet fortitudinem

₁₀igitur vos omnes convertimini et venite

et non inveniam in vobis ullum sapientem

₁₁dies mei transierunt

cogitationes meae dissipatae sunt torquentes cor meum

₁₂noctem verterunt in diem et rursum post tenebras spero lucem

₁₃si sustinuero infernus domus mea est

in tenebris stravi lectulum meum

₁₄putredini dixi pater meus es mater mea et soror mea vermibus

₁₅ubi est ergo nunc praestolatio mea

et patientiam meam quis considerat

₁₆in profundissimum infernum descendent omnia mea

putasne saltim ibi erit requies mihi