ISAIAS PROPHETA 54

₁lauda sterilis quae non paris

decanta laudem et hinni quae non pariebas

quoniam multi filii desertae

magis quam eius quae habebat virum dicit Dominus

₂dilata locum tentorii tui

et pelles tabernaculorum tuorum extende ne parcas

longos fac funiculos tuos et clavos tuos consolida

₃ad dexteram enim et ad levam penetrabis

et semen tuum gentes hereditabit et civitates desertas inhabitabit

₄noli timere quia non confunderis

neque erubescas non enim te pudebit

quia confusionis adulescentiae tuae oblivisceris

et obprobrii viduitatis tuae non recordaberis amplius

₅quia dominabitur tui qui fecit te Dominus exercituum nomen eius

et redemptor tuus Sanctus Israhel Deus omnis terrae vocabitur

₆quia ut mulierem derelictam et maerentem spiritu vocavit te Dominus

et uxorem ab adulescentia abiectam dixit Deus tuus

₇ad punctum in modico dereliqui te

et in miserationibus magnis congregabo te

₈in momento indignationis abscondi faciem meam parumper a te

et in misericordia sempiterna misertus sum tui

dixit redemptor tuus Dominus

₉sicut in diebus Noe istud mihi est

cui iuravi ne inducerem aquas Noe ultra super terram

sic iuravi ut non irascar tibi et non increpem te

₁₀montes enim commovebuntur et colles contremescent

misericordia autem mea non recedet

et foedus pacis meae non movebitur dixit miserator tuus Dominus

₁₁paupercula tempestate convulsa absque ulla consolatione

ecce ego sternam per ordinem lapides tuos

et fundabo te in sapphyris

₁₂et ponam iaspidem propugnacula tua

et portas tuas in lapides sculptos

et omnes terminos tuos in lapides desiderabiles

₁₃universos filios tuos doctos a Domino

et multitudinem pacis filiis tuis

₁₄et in iustitia fundaberis

recede procul a calumnia quia non timebis

et a pavore quia non adpropinquabit tibi

₁₅ecce accola veniet qui non erat mecum

advena quondam tuus adiungetur tibi

₁₆ecce ego creavi fabrum sufflantem in igne prunas

et proferentem vas in opus suum

et ego creavi interfectorem ad disperdendum

₁₇omne vas quod fictum est contra te non dirigetur

et omnem linguam resistentem tibi in iudicio iudicabis

haec hereditas servorum Domini

et iustitia eorum apud me dicit Dominus