ISAIAS PROPHETA 28

₁vae coronae superbiae ebriis Ephraim

et flori decidenti gloriae exultationis eius

qui erant in vertice vallis pinguissimae errantes a vino

₂ecce validus et fortis Domini

sicut impetus grandinis turbo confringens

sicut impetus aquarum multarum inundantium et emissarum super

terram spatiosam

₃pedibus conculcabitur corona superbiae ebriorum Ephraim

₄et erit flos decidens gloriae exultationis eius

qui est super verticem vallis pinguium

quasi temporaneum ante maturitatem autumni

quod cum aspexerit videns statim ut manu tenuerit devorabit illud

₅in die illa erit Dominus exercituum corona

gloriae

et sertum exultationis residuo populi sui

₆et spiritus iudicii sedenti super iudicium

et fortitudo revertentibus de bello ad portam

₇verum hii quoque prae vino nescierunt

et prae ebrietate erraverunt

sacerdos et propheta nescierunt prae ebrietate absorti sunt a vino

erraverunt in ebrietate nescierunt videntem ignoraverunt iudicium

₈omnes enim mensae repletae sunt vomitu sordiumque

ita ut non esset ultra locus

₉quem docebit scientiam et quem intellegere faciet auditum

ablactatos a lacte apulsos ab uberibus

₁₀quia manda remanda manda remanda

expecta reexpecta expecta reexpecta modicum ibi modicum ibi

₁₁in loquella enim labii et lingua altera loquetur ad

populum istum

₁₂cui dixit haec requies reficite lassum

et hoc est meum refrigerium et noluerunt audire

₁₃et erit eis verbum Domini manda remanda manda remanda

expecta reexpecta expecta reexpecta

modicum ibi modicum ibi

ut vadant et cadant retrorsum

et conterantur et inlaqueentur et capiantur

₁₄propter hoc audite verbum Domini viri inlusores

qui dominamini super populum meum qui est in Hierusalem

₁₅dixistis enim percussimus foedus cum morte

et cum inferno fecimus pactum

flagellum inundans cum transierit non veniet super nos

quia posuimus mendacium spem nostram

et mendacio protecti sumus

₁₆idcirco haec dicit Dominus Deus

ecce ego mittam in fundamentis Sion lapidem

lapidem probatum angularem pretiosum in fundamento fundatum

qui crediderit non festinet

₁₇et ponam iudicium in pondere

et iustitiam in mensura

et subvertet grando spem mendacii

et protectionem aquae inundabunt

₁₈et delebitur foedus vestrum cum morte

et pactum vestrum cum inferno non stabit

flagellum inundans cum transierit eritis ei in conculcationem

₁₉quandocumque pertransierit tollet vos

quoniam mane diluculo pertransibit in die et in nocte

et tantummodo sola vexatio intellectum dabit auditui

₂₀coangustatum est enim stratum ita ut alter decidat

et pallium breve utrumque operire non potest

₂₁sicut enim in monte Divisionum stabit Dominus

sicut in valle quae est in Gabao

irascetur

ut faciat opus suum alienum opus eius

ut operetur opus suum peregrinum est opus ab eo

₂₂et nunc nolite inludere ne forte constringantur vincula vestra

consummationem enim et adbreviationem audivi a Domino Deo exercituum

super universam terram

₂₃auribus percipite et audite vocem meam

adtendite et audite eloquium meum

₂₄numquid tota die arabit arans ut serat

proscindet et sariet humum suam

₂₅nonne cum adaequaverit faciem eius

seret gith et cyminum sparget

et ponet triticum per ordinem

et hordeum et milium et viciam in finibus suis

₂₆et erudiet eum illud in iudicio

Deus suus docebit eum illud

₂₇non enim in serris triturabitur gith

nec rota plaustri super cyminum circumiet

sed in virga excutietur gith et cyminum in baculo

₂₈panis autem comminuetur

verum non in perpetuum triturans triturabit illum

neque vexabit eum rota plaustri

nec in ungulis suis comminuet eum

₂₉et hoc a Domino Deo exercituum exivit

ut mirabile faceret consilium et magnificaret iustitiam