ISAIAS PROPHETA 22

₁onus vallis Visionis

quidnam tibi quoque est

quia ascendisti et tu omnis in tecta

₂clamoris plena urbs frequens civitas exultans

interfecti tui non interfecti gladio nec mortui in bello

₃cuncti principes tui fugerunt simul dureque ligati sunt

omnes qui inventi sunt vincti sunt pariter procul fugerunt

₄propterea dixi recedite a me amare flebo

nolite incumbere ut consolemini me

super vastitate filiae populi mei

₅dies enim interfectionis et conculcationis et fletuum

Domino Deo exercituum in valle Visionis

scrutans murum et magnificus super montem

₆et Aelam sumpsit faretram currum hominis equitis

et parietem nudavit clypeus

₇et erunt electae valles tuae plenae quadrigarum

et equites ponent sedes suas in porta

₈et revelabitur operimentum Iudae

et videbis in die illa armamentarium domus saltus

₉et scissuras civitatis David videbitis quia multiplicatae sunt

et congregastis aquas piscinae inferioris

₁₀et domos Hierusalem numerastis

et destruxistis domos ad muniendum murum

₁₁et lacum fecistis inter duos muros et aquam piscinae

veteris

et non suspexistis ad eum qui fecerat eam

et operatorem eius de longe non vidistis

₁₂et vocavit Dominus Deus exercituum in die illa

ad fletum et ad planctum ad calvitium et ad cingulum

sacci

₁₃et ecce gaudium et laetitia

occidere vitulos et iugulare arietes

comedere carnes et bibere vinum

comedamus et bibamus cras enim moriemur

₁₄et revelata est in auribus meis Domini

exercituum

si dimittetur iniquitas haec vobis donec moriamini

dicit Dominus Deus exercituum

₁₅haec dicit Dominus Deus exercituum

vade ingredere ad eum qui habitat in tabernaculo

ad Sobnam praepositum templi

₁₆quid tu hic aut quasi quis hic quia excidisti tibi hic sepulchrum

excidisti in excelso memoriam

diligenter in petra tabernaculum tibi

₁₇ecce Dominus asportari te faciet sicut asportatur gallus gallinacius

et quasi amictum sic sublevabit te

₁₈coronans coronabit te tribulatione

quasi pilam mittet te in terram latam et spatiosam

ibi morieris et ibi erit currus gloriae tuae

ignominia domus Domini tui

₁₉et expellam te de statione tua et de ministerio tuo deponam te

₂₀et erit in die illa

vocabo servum meum Eliachim filium Helciae

₂₁et induam illum tunicam tuam

et cingulo tuo confortabo eum

et potestatem tuam dabo in manu eius

et erit quasi pater habitantibus Hierusalem et domui Iuda

₂₂et dabo clavem domus David super umerum eius

et aperiet et non erit qui claudat et claudet et non erit qui aperiat

₂₃et figam illum paxillum in loco fideli

et erit in solium gloriae domui patris sui

₂₄et suspendent super eum omnem gloriam domus patris eius

vasorum diversa genera omne vas parvulum

a vasis craterarum usque ad omne vas musicorum

₂₅in die illo dicit Dominus exercituum

auferetur paxillus qui fixus fuerat in loco fideli

et frangetur et cadet et peribit quod pependerat in eo

quia Dominus locutus est