ISAIAS PROPHETA 15

₁onus Moab

quia nocte vastata est Ar Moab conticuit

quia nocte vastatus est murus Moab conticuit

₂ascendit domus et Dibon ad excelsa in planctum

super Nabo et super Medaba Moab ululabit

in cunctis capitibus eius calvitium omnis barba radetur

₃in triviis eius accincti sunt sacco

super tecta eius et in plateis eius omnis ululat

descendit in fletum

₄clamavit Esebon et Eleale usque Iasa audita est vox eorum

super hoc expediti Moab ululabunt anima eius ululabit sibi

₅cor meum ad Moab clamabit

vectes eius usque ad Segor vitulam conternantem

per ascensum enim Luith flens ascendet

et in via Oronaim clamorem contritionis levabunt

₆aquae enim Nemrim desertae erunt

quia aruit herba defecit germen viror omnis interiit

₇secundum magnitudinem operis et visitatio eorum

ad torrentem salicum ducent eos

₈quoniam circumiit clamor terminum Moab

usque ad Gallim ululatus eius

et usque ad puteum Helim clamor eius

₉quia aquae Dibon repletae sunt sanguine

ponam enim super Dibon additamenta

his qui fugerint de Moab leonem et reliquiis terrae