HIEZECHIEL PROPHETA 23

₁et factus est sermo Domini ad me dicens

₂fili hominis duae mulieres filiae matris unius fuerunt

₃et fornicatae sunt in Aegypto in adulescentia sua fornicatae sunt

ibi subacta sunt ubera earum

et fractae sunt mammae pubertatis earum

₄nomina autem earum Oolla maior et Ooliba soror eius

et habui eas et pepererunt filios et filias

porro earum nomina Samaria Oolla et Hierusalem Ooliba

₅fornicata est igitur Oolla super me

et insanivit in amatores suos in Assyrios propinquantes

₆vestitos hyacintho principes et magistratus iuvenes cupidinis

universos equites ascensores equorum

₇et dedit fornicationes suas super eos

electos filios Assyriorum universos

et in omnibus in quos insanivit in inmunditiis eorum polluta est

₈insuper et fornicationes suas quas habuerat in Aegypto non reliquit

nam et illi dormierant cum ea in adulescentia eius

et illi confregerant ubera pubertatis eius

et effuderant fornicationem suam super eam

₉propterea tradidi eam in manu amatorum suorum

in manus filiorum Assur super quorum insanivit libidinem

₁₀ipsi discoperuerunt ignominiam eius

filios et filias illius tulerunt et ipsam occiderunt

gladio

et factae sunt famosae mulieres

et iudicia perpetrarunt in ea

₁₁quod cum vidisset soror eius Ooliba plus quam illa insanivit libidine

et fornicationem suam super fornicationem sororis suae

₁₂ad filios Assyriorum praebuit inpudenter

ducibus et magistratibus ad se venientibus indutis veste varia

equitibus qui vectabantur equis

et adulescentibus forma cunctis egregia

₁₃et vidi quod polluta esset via una ambarum

₁₄et auxit fornicationes suas

cumque vidisset viros depictos in pariete

imagines Chaldeorum expressas coloribus

₁₅et accinctos balteis renes et tiaras tinctas in capitibus eorum

formam ducum omnium similitudinem filiorum Babylonis

terraeque Chaldeorum in qua orti sunt

₁₆et insanivit super eos concupiscentia oculorum suorum

et misit nuntios ad eos in Chaldeam

₁₇cumque venissent ad eam filii Babylonis ad cubile mammarum

polluerunt eam stupris suis

et polluta est ab eis et saturata est anima eius ab illis

₁₈denudavit quoque fornicationes suas

et discoperuit ignominiam suam

et recessit anima mea ab ea sicut recesserat anima mea a sorore eius

₁₉multiplicavit enim fornicationes suas

recordans dies adulescentiae suae

quibus fornicata est in terra Aegypti

₂₀et insanivit libidine super concubitu eorum

quorum carnes sunt ut carnes asinorum

et sicut fluxus equorum fluxus eorum

₂₁et visitasti scelus adulescentiae tuae

quando subacta sunt in Aegypto ubera tua

et confractae mammae pubertatis tuae

₂₂propterea Ooliba haec dicit Dominus Deus

ecce ego suscitabo omnes amatores tuos contra te

de quibus satiata est anima tua

et congregabo eos adversum te in circuitu

₂₃filios Babylonis et universos Chaldeos

nobiles tyrannosque et principes

omnes filios Assyriorum iuvenes forma egregia

duces et magistratus universos

principes principum et nominatos ascensores equorum

₂₄et venient super te instructi curru et rota multitudo populorum

lorica et clypeo et galea armabuntur contra te undique

et dabo coram eis iudicium et iudicabunt te iudiciis suis

₂₅et ponam zelum meum in te quem exercent tecum in furore

nasum tuum et aures tuas praecident

et quae remanserint gladio concident

ipsi filios tuos et filias tuas capient

et novissimum tuum devorabitur igni

₂₆et denudabunt te vestimentis tuis et tollent vasa gloriae tuae

₂₇et requiescere faciam scelus tuum de te

et fornicationem tuam de terra Aegypti

nec levabis oculos tuos ad eos et Aegypti non recordaberis amplius

₂₈quia haec dicit Dominus Deus

ecce ego tradam te in manus eorum quos odisti

in manu de quibus satiata est anima tua

₂₉et agent tecum in odio et tollent omnes labores tuos

et dimittent te nudam et ignominia plenam

revelabitur ignominia fornicationum tuarum

scelus tuum et fornicationes tuae

₃₀fecerunt haec tibi

quia fornicata es post gentes

inter quas polluta es in idolis eorum

₃₁in via sororis tuae ambulasti et dabo calicem eius in manu tua

₃₂haec dicit Dominus Deus

calicem sororis tuae bibes profundum et latum

eris in derisum et in subsannationem quae es capacissima

₃₃ebrietate et dolore repleberis

calice maeroris et tristitiae calice sororis tuae Samariae

₃₄et bibes illum et epotabis usque ad feces

et fragmenta eius devorabis

et ubera tua lacerabis quia ego locutus sum ait Dominus Deus

₃₅propterea haec dicit Dominus Deus

quia oblita es mei et proiecisti me post corpus tuum

tu quoque porta scelus tuum et fornicationes tuas

₃₆et ait Dominus ad me dicens

fili hominis numquid iudicas Oollam et Oolibam

et adnuntias eis scelera earum

₃₇quia adulterae sunt et sanguis in manibus earum

et cum idolis suis fornicatae sunt

insuper et filios suos quos genuerunt mihi obtulerunt eis ad devorandum

₃₈sed et hoc fecerunt mihi

polluerunt sanctuarium meum in die illa

et sabbata mea profanaverunt

₃₉cumque immolarent filios suos idolis suis

et ingrederentur sanctuarium meum in die illa ut polluerent illud

etiam haec fecerunt in medio domus meae

₄₀miserunt ad viros venientes de longe

ad quos nuntium miserant

itaque ecce venerunt quibus te lavisti

et circumlevisti stibio oculos tuos

et ornata es mundo muliebri

₄₁sedisti in lecto pulcherrimo

et mensa ordinata est ante te

thymiama meum et unguentum meum posuisti super eam

₄₂et vox multitudinis exultantis erat in ea

et in viris qui de multitudine hominum adducebantur

et veniebant de deserto

posuerunt armillas in manibus eorum

et coronas speciosas in capitibus eorum

₄₃et dixi ei quae adtrita est in adulteriis

nunc fornicabitur in fornicatione sua etiam haec

₄₄et ingressi sunt ad eam quasi ad mulierem meretricem

sic ingrediebantur ad Oollam et ad Oolibam mulieres nefarias

₄₅viri ergo iusti sunt hii iudicabunt eas iudicio adulterarum

et iudicio effundentium sanguinem

quia adulterae sunt et sanguis in manibus earum

₄₆haec enim dicit Dominus Deus

adduc ad eas multitudinem

et trade eas in tumultum et in rapinam

₄₇et lapidentur lapidibus populorum et confodiantur gladiis eorum

filios et filias earum interficient et domos earum igne succendent

₄₈et auferam scelus de terra

et discent omnes mulieres ne faciant secundum scelus earum

₄₉et dabunt scelus vestrum super vos

et peccata idolorum vestrorum portabitis

et scietis quia ego Dominus Deus