LIBER DEUTERONOMII 27

₁praecepit autem Moses et seniores Israhel populo dicentes

custodite omne mandatum quod praecipio vobis hodie

₂cumque transieritis Iordanem

in terram quam Dominus Deus tuus dabit tibi

eriges ingentes lapides et calce levigabis eos

₃ut possis in eis scribere omnia verba legis huius Iordane transmisso

ut introeas terram quam Dominus Deus tuus dabit tibi

terram lacte et melle manantem

sicut iuravit patribus tuis

₄quando ergo transieritis Iordanem

erige lapides quos ego hodie

praecipio vobis in monte Hebal

et levigabis calce

₅et aedificabis ibi altare Domino Deo tuo

de lapidibus quos ferrum non tetigit

₆et de saxis informibus et inpolitis

et offeres super eo holocausta Domino Deo tuo

₇et immolabis hostias pacificas

comedesque ibi et epulaberis coram Domino Deo tuo

₈et scribes super lapides omnia verba legis huius plane et lucide

₉dixeruntque Moses et sacerdotes levitici generis ad omnem Israhelem

adtende et audi Israhel hodie factus es populus Domini Dei tui

₁₀audies vocem eius

et facies mandata atque iustitias quas ego praecipio tibi

₁₁praecepitque Moses populo in die illo dicens

₁₂hii stabunt ad benedicendum Domino super montem

Garizim

Iordane transmisso

Symeon Levi Iudas Isachar Ioseph et Beniamin

₁₃et e regione isti stabunt ad maledicendum in monte Hebal

Ruben Gad et Aser Zabulon Dan et Nepthalim

₁₄et pronuntiabunt Levitae

dicentque ad omnes viros Israhel excelsa voce

₁₅maledictus homo qui facit sculptile et conflatile

abominationem Domini

opus manuum artificum ponetque illud in abscondito

et respondebit omnis populus et dicet amen

₁₆maledictus qui non honorat patrem suum et matrem

et dicet omnis populus amen

₁₇maledictus qui transfert terminos proximi sui

et dicet omnis populus amen

₁₈maledictus qui errare facit caecum in itinere

et dicet omnis populus amen

₁₉maledictus qui pervertit iudicium advenae pupilli et viduae

et dicet omnis populus amen

₂₀maledictus qui dormit cum uxore patris sui

et revelat operimentum lectuli eius

et dicet omnis populus amen

₂₁maledictus qui dormit cum omni iumento

et dicet omnis populus amen

₂₂maledictus qui dormit cum sorore sua

filia patris sui sive matris suae

et dicet omnis populus amen

₂₃maledictus qui dormit cum socru sua

et dicet omnis populus amen

₂₄maledictus qui clam percusserit proximum suum

et dicet omnis populus amen

₂₅maledictus qui accipit munera

ut percutiat animam sanguinis innocentis

et dicet omnis populus amen

₂₆maledictus qui non permanet in sermonibus legis huius

nec eos opere perficit

et dicet omnis populus amen