LIBER II MACCHABEORUM 8

₁Iudas vero Macchabeus et qui cum illo erant

introibant latenter in castella

et convocantes cognatos

et eos qui permanserant in iudaismo

adsumentes eduxerunt ad sex milia viros

₂et invocabant Dominum

ut respiceret in populum qui ab omnibus calcabatur

misereretur templo quod contaminabatur ab impiis

₃misereretur etiam exterminio civitatis

quae esset ilico conplananda

et vocem sanguinis ad se clamantis audiret

₄memoraretur quoque iniquissimas mortes innocentium parvulorum

et blasphemias nomini suo inlatas

et indignaretur super his

₅at Macchabeus congregata multitudine

intolerabilis gentibus efficiebatur

ira enim Domini in misericordiam conversa est

₆et superveniens castellis et civitatibus

inprovisus succendebat eas

et oportuna loca occupans non paucas hostium strages dabat

₇maxime autem noctibus ad huiuscemodi excursus ferebatur

et fama virtutis eius ubique diffundebatur

₈videns autem Philippus

paulatim virum ad profectum venire

ac frequentius res ei prospere cedere

ad Ptolomeum ducem Coelesyriae et Foenicis scripsit

ut auxilium ferret regis negotiis

₉at ille velociter misit Nicanorem Patrocli de primoribus amicum

datis ei permixtis gentibus armatis non minus

viginti milibus

ut universum Iudaeorum genus deleret

adiuncto ei Gorgia viro militari

₁₀constituit autem Nicanor regi ut tributum Romanis quod erat dandum

duo milia talentum de captivitate Iudaeorum suppleret

₁₁statimque ad maritimas misit civitates

convocans ad coemptionem iudaeorum mancipiorum

promittens se nonaginta mancipia talento distracturum

non respiciens ad vindictam

quae eum ab Omnipotente esset consecutura

₁₂Iudas autem ubi conperit

indicavit his qui secum erant Iudaeis Nicanoris adventum

₁₃ex quibus quidam formidantes et non credentes Dei iustitiae

in fugam vertebantur

₁₄alii vero si quid eis supererat vendebant

simulque Dominum deprecabantur ut eriperet eos ab impio Nicanore

qui eos priusquam in comminus veniret vendiderat

₁₅si non propter eos

propter testamentum quod erat ad patres eorum

et propter invocationem sancti et magnifici nominis eius super ipsos

₁₆convocatis autem Macchabeus septem milibus qui cum ipso erant

rogabat ne hostibus reconciliarentur

neque metuerent inique venientium adversum se hostium

multitudinem

sed fortiter contenderent

₁₇ante oculos habentes contumeliam

quae in locum sanctum ab his iniuste esset inlata

itemque et ludibria habitae civitatis iniuriam

adhuc etiam veterum instituta convulsa

₁₈nam illi quidem armis confidunt ait simul et audacia

nos autem in omnipotente Domino

qui potest venientes adversus nos

et universum mundum uno nutu delere confidimus

₁₉admonuit autem eos et de auxiliis Dei

quae facta sunt erga parentes

et sub Sennacherim centum

octoginta quinque milia ut perierunt

₂₀et de proelio quod eis adversus Galatas fuit in Babylonia

ut omnes ubi ad rem ventum est

Macedonibus sociis haesitantibus

ipsi sex milia soli peremerunt centum viginti milia

propter auxilium illis datum e caelo

et beneficia pro his plurima consecuti sunt

₂₁his verbis constantes effecti sunt

et pro legibus et patria mori parati

₂₂constituit itaque fratres suos duces utrique ordini

Simonem et Iosepphum et Ionathan

subiectis unicuique millenis et quingentenis

₂₃ad hoc etiam ab Ezra lecto illis sancto libro

et dato signo adiutorio Dei

in prima acie ipse dux commisit cum Nicanore

₂₄et facto sibi adiutore Omnipotente

interfecerunt super novem milia hominum

maiorem autem partem exercitus Nicanoris vulneribus debilem

factam fugere conpulerunt

₂₅pecuniis vero eorum qui ad emptionem ipsorum venerant sublatis

ipsos usquequaque persecuti sunt

₂₆sed reverterunt hora conclusi

nam erat ante sabbatum

quam ob causam non perseveraverunt insequentes

₂₇arma autem ipsorum et spolia congregantes

sabbatum agebant benedicentes Dominum

qui liberavit eos in isto die misericordiae initium stillans in eos

₂₈post sabbatum vero debilibus et orfanis et viduis diviserunt spolia

et residua ipsi cum suis habuere

₂₉his ita gestis

et communiter ab omnibus facta obsecratione

misericordem Dominum postulabant

ut in finem servis suis reconciliaretur

₃₀et ex his qui cum Timotheo et Bacchide erant contra se contendentes

super viginti milia interfecerunt

et munitiones excelsas obtinuerunt et plures praedas diviserunt

aequam portionem debilibus pupillis et viduis

sed et senioribus facientes

₃₁et cum arma eorum collegissent

diligenter omnia conposuerunt in locis oportunis

residua vero spolia Hierosolymam detulerunt

₃₂et phylarchen qui cum Timotheo erat interfecerunt

virum scelestum qui in multis Iudaeos adflixerat

₃₃et cum epicinia agerent in Hierosolymis

eos qui sacras ianuas incenderant id est Callistenen

cum in quodam domicilio refugisset incenderunt

digna ei mercede pro impietatibus suis reddita

₃₄facinorosissimus autem Nicanor

qui mille negotiantes ad Iudaeorum venditionem adduxerat

₃₅humiliatus auxilio Domini ab his quos nullos existimaverat

deposita veste gloriae per mediterranea fugiens solus venit Antiochiam

summam infelicitatem de interitu sui exercitus consecutus

₃₆et qui promiserat Romanis se tributum restituere de captivitate Hierosolymorum

praedicabat nunc protectorem Deum habere Iudaeos

et ob ipsum invulnerabiles esse

eo quod sequerentur leges ab ipso constitutas