VERBA DIERUM II 7

₁cumque conplesset Salomon fundens preces

ignis descendit de caelo et devoravit holocausta et victimas

et maiestas Domini implevit domum

₂nec poterant sacerdotes ingredi templum Domini

eo quod implesset maiestas Domini templum Domini

₃sed et omnes filii Israhel videbant descendentem ignem

et gloriam Domini super domum

et corruentes proni in terram super pavimentum stratum lapide

adoraverunt

et laudaverunt Dominum quoniam bonus

quoniam in aeternum misericordia eius

₄rex autem et omnis populus immolabant victimas coram Domino

₅mactavit igitur rex Salomon hostias

boum viginti duo milia arietum centum viginti milia

et dedicavit domum Dei rex et universus populus

₆sacerdotes autem stabant in officiis suis

et Levitae in organis carminum Domini

quae fecit David rex ad laudandum Dominum

quoniam in aeternum misericordia eius

hymnos David canentes per manus suas

porro sacerdotes canebant tubis ante eos cunctusque Israhel stabat

₇sanctificavit quoque Salomon medium atrii ante templum Domini

obtulerat enim ibi holocausta et adipes pacificorum

quia altare aeneum quod fecerat

non poterat sustinere holocausta et sacrificia et adipes

₈fecit ergo Salomon sollemnitatem in tempore illo septem diebus

et omnis Israhel cum eo ecclesia magna valde

ab introitu Emath usque ad torrentem Aegypti

₉fecitque die octavo collectam

eo quod dedicasset altare septem diebus

et sollemnitatem celebrasset diebus septem

₁₀igitur in die vicesimo tertio mensis septimi

dimisit populos ad tabernacula sua

laetantes atque gaudentes super bono quod fecerat Dominus

David et Salomoni et Israhel populo suo

₁₁conplevitque Salomon domum Domini et domum regis

et omnia quae disposuerat in corde suo

ut faceret in domo Domini et in domo sua

et prosperatus est

₁₂apparuit autem ei Dominus nocte et ait audivi orationem tuam

et elegi locum istum mihi in domum sacrificii

₁₃si clausero caelum et pluvia non fluxerit

et mandavero et praecepero lucustae ut devoret terram

et misero pestilentiam in populum meum

₁₄conversus autem populus meus super quos invocatum est nomen meum

deprecatus me fuerit et exquisierit faciem meam

et egerit paenitentiam a viis suis pessimis

et ego exaudiam de caelo et propitius ero peccatis eorum

et sanabo terram eorum

₁₅oculi quoque mei erunt aperti et aures meae erectae

ad orationem eius qui in loco isto oraverit

₁₆elegi enim et sanctificavi locum istum

ut sit nomen meum ibi in sempiternum

et permaneant oculi mei et cor meum ibi cunctis diebus

₁₇tu quoque si ambulaveris coram me sicut ambulavit David pater tuus

et feceris iuxta omnia quae praecepi tibi

et iustitias meas iudiciaque servaveris

₁₈suscitabo thronum regni tui

sicut pollicitus sum David patri tuo dicens

non auferetur de stirpe tua vir qui sit princeps in Israhel

₁₉si autem aversi fueritis

et dereliqueritis iustitias meas et praecepta mea quae proposui vobis

et abeuntes servieritis diis alienis et adoraveritis eos

₂₀evellam vos de terra mea quam dedi vobis

et domum hanc quam sanctificavi

nomini meo

proiciam a facie mea

et tradam eam in parabolam et in exemplum cunctis populis

₂₁et domus ista erit in proverbium universis transeuntibus

et dicent stupentes

quare fecit Dominus sic terrae huic et domui huic

₂₂respondebuntque quia dereliquerunt Dominum Deum patrum suorum

qui eduxit eos de terra Aegypti

et adprehenderunt deos alienos

et adoraverunt eos atque coluerunt

idcirco venerunt super eos universa haec mala