VERBA DIERUM II 23

₁anno autem septimo confortatus Ioiadae adsumpsit centuriones

Azariam videlicet filium Hieroam et Ismahel filium Iohanan

Azariam quoque filium Oded et Maasiam filium Adaiae

et Elisaphat filium Zechri

et iniit cum eis foedus

₂qui circumeuntes Iudam

congregaverunt Levitas de cunctis urbibus Iuda

et principes familiarum Israhel

veneruntque in Hierusalem

₃iniit igitur omnis multitudo pactum

in domo Domini cum rege

dixitque ad eos Ioiadae

ecce filius regis regnabit

sicut locutus est Dominus super filios David

₄iste est ergo sermo quem facietis

₅tertia pars vestrum qui veniunt ad sabbatum sacerdotum et Levitarum et

ianitorum

erit in portis

tertia vero pars ad domum regis

et tertia in porta quae appellatur

Fundamenti

omne vero reliquum vulgus sit in atriis domus Domini

₆nec quisquam alius ingrediatur domum Domini

nisi sacerdotes et qui ministrant de Levitis

ipsi tantummodo ingrediantur quia sanctificati sunt

et omne reliquum vulgus observet custodias Domini

₇Levitae autem circumdent regem habentes singuli arma sua

et si quis alius ingressus fuerit templum interficiatur

sintque cum rege et intrante et egrediente

₈fecerunt igitur Levitae et universus Iuda

iuxta omnia quae praeceperat Ioiadae pontifex

et adsumpserunt singuli viros qui sub se erant

et veniebant per ordinem sabbati

cum his qui iam impleverant sabbatum et egressuri erant

siquidem Ioiadae pontifex non dimiserat abire turmas

quae sibi per singulas ebdomadas succedere consueverant

₉deditque Ioiadae sacerdos centurionibus lanceas

clypeosque et peltas regis David quas consecraverat in domo Domini

₁₀constituitque omnem populum tenentium pugiones

a parte templi dextra usque ad partem templi sinistram

coram altari et templo per circuitum regis

₁₁et eduxerunt filium regis et inposuerunt ei diadema

dederuntque in manu eius tenendam legem

et constituerunt eum regem

unxit quoque illum Ioiadae pontifex et

filii eius

inprecatique sunt atque dixerunt vivat rex

₁₂quod cum audisset Otholia

vocem scilicet currentium atque laudantium regem

ingressa est ad populum in templum Domini

₁₃cumque vidisset regem stantem super gradum in introitu

et principes turmasque circa eum

omnem quoque populum terrae gaudentem atque clangentem

tubis

et diversi generis organis concinentem vocemque laudantium

scidit vestimenta sua et ait insidiae insidiae

₁₄egressus autem Ioiadae pontifex ad centuriones et

principes exercitus dixit eis

educite illam extra septa templi et interficiatur foris gladio

praecepitque sacerdos ne occideretur in domo Domini

₁₅et inposuerunt cervicibus eius manus

cumque intrasset portam Equorum domus regis interfecerunt eam ibi

₁₆pepigit autem Ioiadae foedus inter se universumque

populum et regem

ut esset populus Domini

₁₇itaque ingressus est omnis populus domum Baal et destruxerunt eam

et altaria ac simulacra illius confregerunt

Matthan quoque sacerdotem Baal interfecerunt ante aras

₁₈constituit autem Ioiadae praepositos in domo Domini

et sub manibus sacerdotum ac Levitarum

quos distribuit David in domo Domini

ut offerrent holocausta Domino

sicut scriptum est in lege Mosi

in gaudio et canticis iuxta dispositionem David

₁₉constituit quoque ianitores in portis domus Domini

ut non ingrederetur eam inmundus in omni re

₂₀adsumpsitque centuriones et fortissimos viros

ac principes populi et omne vulgus terrae

et fecerunt descendere regem de domo Domini

et introire per medium portae superioris in domum regis

et conlocaverunt eum in solio regali

₂₁laetatusque est omnis populus terrae et urbs quievit

porro Otholia interfecta est gladio