VERBA DIERUM I 5

₁filii quoque Ruben primogeniti Israhel

ipse quippe fuit primogenitus eius

sed cum violasset torum patris sui

data sunt primogenita eius filiis Ioseph filii Israhel

et non est ille reputatus in primogenitum

₂porro Iudas qui erat fortissimus inter fratres suos

de stirpe eius principes germinati sunt

primogenita autem reputata sunt Ioseph

₃filii ergo Ruben primogeniti Israhel Enoch et Phallu Esrom et Charmi

₄filii Iohel Samaia filius eius Gog filius eius

Semei filius eius

₅Micha filius eius Reeia filius eius

Baal filius eius

₆Beera filius eius

quem captivum duxit Theglathphalnasar rex Assyriorum

et fuit princeps in tribu Ruben

₇fratres autem eius et universa cognatio

quando numerabantur per familias suas

habuerunt principes Ieihel et Zacchariam

₈porro Bala filius Azaz filii Samma filii Iohel

ipse habitavit in Aroer usque ad Nebo et Beelmeon

₉contra orientalem quoque plagam

habitavit usque ad introitum heremi et flumen Eufraten

multum quippe iumentorum numerum possidebat in terra Galaad

₁₀in diebus autem Saul

proeliati sunt contra Agareos et interfecerunt illos

habitaveruntque pro eis in tabernaculis eorum

in omni plaga quae respicit ad orientem Galaad

₁₁filii vero Gad e regione eorum habitaverunt

in terra Basan usque Selcha

₁₂Iohel in capite et Saphan secundus

Ianai autem et Saphat in Basan

₁₃fratres vero eorum secundum domos cognationum suarum

Michahel et Mosollam et Sebe et Iori

et Iachan et Zie et Heber septem

₁₄hii filii Abiahil filii Uri filii Iaro filii Galaad

filii Michahel filii Iesesi filii Ieddo filii Buz

₁₅fratres quoque filii Abdihel filii Guni

princeps domus in familiis suis

₁₆et habitaverunt in Galaad et in Basan et in viculis eius

et in cunctis suburbanis Saron usque ad terminos

₁₇omnes hii numerati sunt in diebus Ioatham regis Iuda

et in diebus Hieroboam regis Israhel

₁₈filii Ruben et Gad et dimidiae tribus Manasse

viri bellatores scuta portantes et gladios

et tendentes arcum eruditique ad proelia

quadraginta quattuor milia et septingenti sexaginta

procedentes ad pugnam

₁₉dimicaverunt contra Agarenos

Iturei vero et Naphei et Nodab

₂₀praebuerunt eis auxilium

traditique sunt in manus eorum Agareni

et universi qui fuerant cum eis

quia Deum invocaverunt cum proeliarentur

et exaudivit eos eo quod credidissent in eum

₂₁ceperuntque omnia quae possederant

camelorum quinquaginta milia

et ovium ducenta quinquaginta milia asinos duo milia

et animas hominum centum milia

₂₂vulnerati autem multi corruerunt fuit enim bellum Domini

habitaveruntque pro eis usque ad transmigrationem

₂₃filii quoque dimidiae tribus Manasse possederunt terram

a finibus Basan usque Baalhermon et Sanir et montem Hermon

ingens quippe numerus erat

₂₄et hii fuerunt principes domus cognationis eorum

Epher et Iesi et Helihel Ezrihel et Hieremia et Odoia

et Iedihel

viri fortissimi et potentes et nominati duces in familiis suis

₂₅reliquerunt autem Deum patrum suorum

et fornicati sunt post deos populorum terrae

quos abstulit Dominus coram eis

₂₆et suscitavit Deus Israhel spiritum Ful regis Assyriorum

et spiritum Theglathphalnasar regis Assur

et transtulit Ruben et Gad et dimidium tribus Manasse

et adduxit eos in Alae et Abor et

Ara et fluvium Gozan

usque ad diem hanc