VERBA DIERUM I 16

₁adtulerunt igitur arcam Dei

et constituerunt eam in medio tabernaculi

quod tetenderat ei David

et obtulerunt holocausta et pacifica coram Deo

₂cumque conplesset David offerens holocausta et pacifica

benedixit populo in nomine Domini

₃et divisit universis per singulos a viro usque ad mulierem

tortam panis et partem assae carnis bubulae et frixam oleo similam

₄constituitque coram arca Domini de Levitis

qui ministrarent et recordarentur operum eius

et glorificarent atque laudarent Dominum Deum Israhel

₅Asaph principem et secundum eius Zacchariam

porro Iahihel et Semiramoth et Ieihel et Matthathiam

et Eliab et Banaiam et Obededom et Ieihel

super organa psalterii et lyras

Asaph autem ut cymbalis personaret

₆Banaiam vero et Azihel sacerdotes

canere tuba iugiter coram arca foederis Domini

₇in illo die fecit David principem ad confitendum Domino Asaph et

fratres eius

₈confitemini Domino invocate nomen eius

notas facite in populis adinventiones illius

₉canite ei et psallite

et narrate omnia mirabilia eius

₁₀laudate nomen sanctum eius

laetetur cor quaerentium Dominum

₁₁quaerite Dominum et virtutem eius quaerite faciem eius semper

₁₂recordamini mirabilium eius quae fecit

signorum illius et iudiciorum oris eius

₁₃semen Israhel servi eius filii Iacob electi illius

₁₄ipse Dominus Deus noster in universa terra iudicia eius

₁₅recordamini in sempiternum pacti eius

sermonis quem praecepit in mille generationes

₁₆quem pepigit cum Abraham et iuramenti illius cum Isaac

₁₇et constituit illud Iacob in praeceptum

et Israhel in pactum sempiternum

₁₈dicens tibi dabo terram Chanaan funiculum hereditatis vestrae

₁₉cum essent pauci numero parvi et coloni eius

₂₀et transierunt de gente in gentem et de regno ad populum alterum

₂₁non dimisit quemquam calumniari eos

sed increpuit pro eis reges

₂₂nolite tangere christos meos et in prophetis meis nolite malignari

₂₃canite Domino omnis terra

adnuntiate ex die in diem salutare eius

₂₄narrate in gentibus gloriam eius

in cunctis populis mirabilia illius

₂₅quia magnus Dominus et laudabilis nimis

et horribilis super omnes deos

₂₆omnes enim dii populorum idola Dominus autem caelos fecit

₂₇confessio et magnificentia coram eo

fortitudo et gaudium in loco eius

₂₈adferte Domino familiae populorum

adferte Domino gloriam et imperium

₂₉date Domino gloriam nomini eius levate sacrificium

et venite in conspectu eius et adorate Dominum in decore sancto

₃₀commoveatur a facie illius omnis terra

ipse enim fundavit orbem inmobilem

₃₁laetentur caeli et exultet terra

et dicant in nationibus Dominus regnavit

₃₂tonet mare et plenitudo eius

exultent agri et omnia quae in eis sunt

₃₃tunc laudabunt ligna saltus coram Domino

quia venit iudicare terram

₃₄confitemini Domino quoniam bonus

quoniam in aeternum misericordia eius

₃₅et dicite salva nos Deus salvator noster

et congrega nos et erue de gentibus

ut confiteamur nomini sancto tuo

et exultemus in carminibus tuis

₃₆benedictus Dominus Deus Israhel ab aeterno usque in aeternum

et dicat omnis populus amen et hymnus Domino

₃₇dereliquit itaque ibi coram arca foederis Domini

Asaph et fratres eius

ut ministrarent in conspectu arcae iugiter

per singulos dies et vices suas

₃₈porro Obededom et fratres eius sexaginta octo

et Obededom filium Idithun et Osa constituit ianitores

₃₉Sadoc autem sacerdotem et fratres illius sacerdotes

coram tabernaculo Domini in excelso quod erat in Gabaon

₄₀ut offerrent holocausta Domino super altare holocaustomatis

iugiter mane et vespere

iuxta omnia quae scripta sunt in lege Domini quam praecepit Israheli

₄₁et post eum Heman et Idithun et reliquos electos

unumquemque vocabulo suo

ad confitendum Domino quoniam in aeternum misericordia eius

₄₂Heman quoque et Idithun canentes tuba

et quatientes cymbala et omnia musicorum organa ad canendum Deo

filios autem Idithun fecit esse portarios

₄₃reversusque est omnis populus in domum suam

et David ut benediceret etiam domui suae